Wednesday, November 16, 2011

NAGMITING TI MFARMC PAKASEKNAN TI PROYEKTO A PAYAO

Cabugao, Ilocos Sur- Naangay ti special meeting dagiti kameng ti Municipal Fish and Aquatic Resource Management Council (MFARMC) iti Municipal Hall, Cabugao, Ilocos Sur a no sadino a ditoy ket tinamingda ti naited a proyekto ti payao manipud iti Bureau of Fisheries and Aquatic Resources (BFAR) Region 1.

Imbatad ni Dardarat Punong Barangay Danny Garcia, Chairman ti MFARMC, a pattapattana ket saan nga umdas ti materiales nga inted ti BFAR  para iti proyekto a payao ket  inawisna dagiti kakaduana a sangsangkamaysada a mangkiddaw iti BFAR Region 1 Officials ti nayonna yantangay siaayat met ti LGU-Cabugao a mangted ti kapadana a kaadu  ta  umayda  mangseminar kadagiti umawat kadagitoy a proyekto ita a Nobiembre 16, 2011  sakbay a maiyusar daytoy a pagkalap.

Imbatad met ni Sabang Punong Barangay Edgardo S. Cobangbang, Sr. a gundawayanda  dagitoy a gannuat para kadagiti kalugaranda a mangngalap ket siaayat a mangpasangbay ti Barangay Sabang kadagiti maangay a miting ken seminar ti MFARMC ngem  kalikagumanna ti naan-anay  a pannakibadang dagiti innem  a Punong Barangay a mangidaulo ti innem a barangay a mangbukel ti Coastal Barangays. 



Iti nasao a miting, impakaammo da MA Zenaida S. Andrada ken Municipal Fisheries Coordinator Milagros R. Paz a malaksid  nga umay dagiti taga-BFAR Regional Office mangseminar kadagiti umawat ti proyekto, makipaset pay dagiti pannakabagi ti DENR-EMB gapu iti maited nga artificial reef ken pakaseknan ti agtultuloy a  mangrove planting and maintenance. Innayon ni MA Andrada a maigunamgunam ti linawas koma  a Coastal Clean-up tapno agballigi ti pannakataripato dagiti naimuladan  a mangrove.

Nakitaripnong met da Mayor Edgardo “Ediboy”  S. Cobangbang, Jr. ken LGOO Constancia Quinola ti MLGOO-Cabugao  a nakipagtaming kadagiti pakaseknan dagiti mangngalap.

Buklen dagiti Kapitanes ti MFARMC a nagatendar ket isuda: PB Danny Garcia-Dardarat; PB Edgardo S. Cobangbang, Sr.-Sabang; PB Eliseo Serrano-Salomague; PB Robertson Gorospe-Namruangan;  ken PB Ronel Zamora-Salapasap. #  (Rinetrato ken insurat ni JOED SABIO SAJONIA)





 

No comments:

Post a Comment