Cabugao, Ilocos Sur (Nobiembre 25, 2011) – Naangay ti Monthly Conference ti Department of the Interior and Local Government (DILG)-Ilocos Sur a buklen ti 30 a Local Government Operations Officers (LGOO’s) a naggapu kadagiti Munisipalidad ti Ilocos Sur a pakaibilangan ni Mrs. Connie Quinola, LGOO ti ili a Cabugao (Host Municipality) idi Nobiembre 25, 2011 sadiay pasdek ti Dardarat Pavilion, Barangay Dardarat, Cabugao, Ilocos Sur.
Napili ti Barangay Dardarat a nakaangayan ti komperensia agsipud ta kayatda met a kitaen ti agdindinamag a Mangrove Plantation-da, Malaga Fish Culture ken ti Dardarat Tulongan Savings Association, segun iti maysa a DILG Officer a nagatendar.
 |
| Ni Ms. Victoria H. Ramos, Provincial Director ti DILG kabayatan ti panagsaritana |
Iti panagsarita ni Brgy. Captain Danny Garcia, nagyaman ta napilida ti barangayda a pakaangayan ti binulan a miting dagiti LGOO’s iti intero nga Ilocos Sur nga idauluan ni Ms. Victoria H. Ramos, Provincial Director ti DILG.
Innayon ti Kapitan a dagitoy a proyektoda ket makatulong unay kadakuada ta iti masapulanda ket saanda a marigatan ti usarenda iti pagsangailida, mayabuloy kadagiti nagminatay ken dadduma pay a paggastuan ti Barangay a didan dakamaten ti pundoda ti IRA.
“Very enterprising ti Barangay Dardarat. Kayatmi a matulad dagiti barangay a masakupanmi,” imbaga ti maysa pay a DILG Officer.
 |
| Ni Mrs. Connie Quinola, LGOO ti ili a Cabugao |
Maysa pay daytoy a panggep ti panagmiting dagiti LGOO’s iti Barangay Dardarat. Malaksid iti on-site orientation, natratar pay dagiti binulan a reportsda (kangrunaan dagiti backlog) tapno masulnitan ken masimpa, pakaseknan ti internal nga organisasionda, ken maadaptarda met dagiti idea ken wagas ti naballigi a barangay kadagiti dadduma a Munisipalidad.
Nagatendar met ni Mayor Edgardo “Ediboy” S. Cobangbang, Jr. iti nadakamat a miting. Iti panagsaritana, binigbig ti Mayor ti pagrebbengan dagiti opisiales ti DILG a mangsursuro kadagiti opisiales-lokal iti episiente a panangakem ti responsibilidadda partikular iti aspeto ti panangidaulo ken pannakaipagteng ti serbisio kadagiti umili. Nagyaman met dagiti opisiales ti DILG iti pannakitaripnong ti Mayor iti mitingda.
 |
| Ti panagsarita ni Mayor Ediboy Cobangbang |
“Agyamanak unay ta malaksid kadagiti adu a pammadayawen a nagun-od ti Barangaymi, mapaspasangasangan manen a maisalip iti sabali ken nangatngato a benneg ti pakontes ket pagyamanak met ken ni Mayor Ediboy ta siak latta ti maibabaon kadagiti seminar pakaseknan ti Coastal Barangays kas iti panagatendarko ti seminar idiay Lingayen ket ditoy a manayonan ti kaammuak iti panangidur-as pay ti Barangaymi ken ti ilitayo a Cabugao,” impeksa ni Brgy. Captain Garcia. # (Insurat ken rinetrato ni JOED S. SAJONIA)
No comments:
Post a Comment