Saturday, November 19, 2011

YELLOW CORN, 207 HAS. NAIMULA ITA A 2ND CROPPING SEASON

Cabugao, Ilocos Sur – Maysa kadagiti gay-at ita ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ket  iti pannakatingiting dagiti maipanawen, nabiit,  ken  na-presio  a klase ti maimula dagiti mannalon nangruna iti “off-season”  babaen iti panangipatungpal ti DA-LGU iti kada panagmumula tapno manayonan pay ti matgedan dagiti mannalon ken mapapintas ti presio gapu iti balanse a kaadu ti produksion.

Maysa met ti mais a nabiit, kasapulan ita  iti merkado ken mairagragpin   a maimula ditoy Ilokos.  Ti Agri-Pinoy Corn Program  ket  ipatpatungpal ti Departamento ti Agrikultura (DA) ken baben  ti DA-LGU ket adda nagmula  ti yellow ken white corn kadagiti Barangays iti  Alina-ay, Arnap, Baclig, Cuantacla-Sagsagat, Cacadiran, Cuancabal, Lipit, Sagayaden (Norte/Sur), Pila, Namruangan, Daclapan, Dardarat, Turod Patac, Pug-os, Salapasap, Quezon ken Marga-ay. Aganay a 207 ektarias ti namulaan iti amarilio ken puraw ti klasena a mais ita a 2nd Crop Season 2011-2012, segun ken ni Mrs. Dionisia Seatriz, Municipal Corn Program Coordinator.

Kuna ni Municipal Agriculturist  Zenaida S. Andrada a nupay maipangruna met latta ti panagmulada ti tabako  iti 2nd Crop (Nobiembre-Mayo) ta 1,649 ektarias ti namulaan iti 2,271 ektarias  a dagup ti agricultural area ti ili, dandani makipatas ti kalawa ti mamulaan ti mais iti pagay. Innayon ti MAO a napintas daytoy a pannakabalanse   ken  mapaggigidiat ti maimula iti umabot iti 2, 271 ektarias a kalawa ti mamulmulaan/mataltalon a daga iti intero nga ili ti Cabugao.


Naaramid ti Demo-Farm ti Cornworld 1401 (maysa ektaria) iti pagmulmulaan ni Mr. Arturo Solis, Presidente ti Arnap Farmer’s Association iti Barangay Arnap, Cabugao, Ilocos Sur ken manamnama a maikurri dagiti naadalda dagiti nagpartisipar iti  babaen iti Farmers’ Field School ti DA-RFU 1  sadiay Sitio Balungabing, Barangay Turod-Patac, Cabugao. Ilocos Sur nga insayangkat met laeng ti DA-LGU iti napalabas a panagmumula ti mais.

Malaksid kadagiti Corn Traders a mangpapigsa ti industria ti mais, adda pay  ti National Agribusiness Corporation (NABCOR) nga aggatang ti sigugumi (siuukis) kadagiti maapit dagiti mannalon tapno maliklikanda ti kangrunaan a pakamolestiaan ti mannalon kas iti kanayon nga agbagkat, agbilag ken nadaras a bukbokenna ti bagina ti mais. 

Nupay kasta, ti puraw a mais ket saan a nakadadanag ta nataray a lakuen para iti konsumo ti kaaduan.
Kuna ni Mrs. Dionisia Seatriz, DA-LGU Corn Program Coordinator a nadaras ti pannakaala dagiti mannalon nga aglaklako iti mais ti bayad ti ilakoda a produktoda iti  NABCOR. Mapaneknekanna ta agmulmula met ti pamiliana iti Barangay Baclig  ken kuykuyogenna dagiti mannalon a mapan aglako ti produktoda kadaytoy semi-government a korporasion.

Innayon ni Mrs. Seatriz a maysa met a prayoridad ti Gobierno Nasional  ti panagpamula ti mais agsipud ta nakasapulan iti industria ti panagtaraken ti baboy ken manok ken mabalin a pagsulnit ti mais  a taraon no kakirang ti bagas.# (Rinetrato ken insurat ni JOED SABIO SAJONIA)

No comments:

Post a Comment