Thursday, November 24, 2011

TI AKEM TI MRF ITI NADALIMANEK A PAGURNONGAN

Cabugao, Ilocos Sur -  Iti umab-abante a panagbiag  ti  kagimongan, sumursurot met a pakakumikoman ti sapasap  ita ti pannakaidalimanek dagiti rugit kas resulta ti umil-ilet pay nga espasio iti urban a lokalidad.

Sagudayen ti linteg ken paset ti programa ti Solid Waste Management, ikagkagumaanan ti Gobierno Munisipal nga ipatungpal ti pannakaidalimanek ti basura tapno agtalinaed a nadalus ken makaay-ayo kadagiti lumugar, bisita ken mamantener ti nasalun-at nga aglawlaw.

Iti miting ti Pederasion ti Rural Improvement Club (RIC), maysa kadagiti napintas a singasing ni Mayor Edgardo  “Ediboy”  S. Cobangbang, Jr. kadagiti inna ti panagproyektoda iti handicraft making babaen kadagiti plastic wastes nga alternatibo  a makatulong a mangkessay ti bulto ti basura.  Ti Cabugao Ladies Intensified Group (CABULIG), maysa nga NGO,  ti nagproyekto iti kastoy a banag.

Ti disso  ti Ecology Center ken ti Composting Bin a pagtungpalan ti amin a makolekta a saanen a marekubre a basura ti Munisipalidad a masarakan iti Sitio Baliw, Barangay Quezon, Cabugao, Ilocos Sur
Innayon ti Mayor a mapapigsa ti pannakaipatungpal ti panagusar ti  Material Recovery Facility (MRF) iti kada barangay babaen ti pannakitinnulong dagiti umili mismo  tapno maymaysa a disso ti paggatangan dagiti agsursursor  ti basura ken scrap materials a saanen a balaybalayenda ket posible pay a pagkakitaan ti asosasion wenno ti barangay a mismo.

Imbatad ni MENRO Edgar S.  Balangatan nga in-inut ti panangedukar kadagiti umili a mangusar  ti MRF. Insingasingna met  a mapapigsa ti panagusar daytoy agsipud ta nairamanen a kas “information drive” ken indicators a pagbasaran  kas iti pannakaiwayat ti Clean and Green Program,  Siglat Award, Laing ti Barangay ken dadduma pay a pakontes ti pananglinis ti aglawlaw.

Insupusop  met  ni MENRO Balangatan nga agpannuray  iti panangiwardas  dagiti opisiales ti barangay ken mismo iti lumugar iti panagballigi ti operasion ti MRF ken pannakaipatungpal ti  Solid Waste Mangagement Program. # (Web Research)

Pakdaar a naipinta ken naitangkarang  kadagiti disso a  nalaka a makita iti nagkurusan wenno pagaarimutongan ti tao

No comments:

Post a Comment