Wednesday, November 9, 2011

BARO NGA AMBULANSIA TI MUNISIPIO, NAISANGPET KEN NABENDISIONAN

Cabugao, Ilocos Sur (Nobiembre 9, 2011) – Nagatang ti baro nga ambulansia ti Gobierno Munisipal ti ili a Cabugao babaen ti panangilungalong da Mayor Edgardo “Ediboy” S. Cobangbang, Jr. ken Vice Mayor Danny Q. Gazmen.

Nayalokaran ti pundo a naigatang babaen iti Calamity Fund ti Munisipio ken inesponsoran ni SB Member Carlito S. Pano, M.D., Chairman, Committee on Health ti Sangguniang Bayan.

Kalpasan ti Flag Ceremony, iti imatang ti LGU Family, naikararagan ken binendisionan ni Rev. Fr. Jeric Jaramillo, ti Simbaan Romano Katoliko ti ili ti kabarbaro a lugan-pangserbisio a naiparada iti asideg ti pasdek ti Munisipio. 

Imbaga ni Bise Mayor Danny Q. Gazmen a mabalin nga ipadamag kadagiti kailian ti kaadda ti baro nga ambulansia a makiddaw a pakailuganan ti maipaagas a masaksakit. Innayon ti Opisial a maammuan iti annuroten ti pannakausar ti lugan manipud iti Municipal Treasurer’s Office ti Munisipio.

Nagatang ti baro a lugan maigapu iti naiget a pagkasapulan kadagiti emerhensia a pagteng nangruna kadagiti kinapet ti “dengue” a sakit. (JEDSS/Photo Taken, Althone & Alvin) 

No comments:

Post a Comment