Tuesday, November 8, 2011

DUA A PROYEKTO, INTED NI DIPUTADO RYAN DITOY CABUGAO

Cabugao, Ilocos Sur (Nobiembre 8, 2011) – Bimmisita ni Congressman Ryan Luis V. Singson, First District, Ilocos Sur  ken ti grupona  iti Munisipio ti ili a Cabugao idi Nobiembre 4, 2011 a no sadino a ditoy ket inyawatna ti tseke nga aggatad iti 1.5 Milion ken ni Brgy. Captain Inocencio Sadac, Chairman, BOD ti Turod Multipurpose Cooperative iti imatang da Mayor Edgardo “Ediboy” S. Cobangbang, Jr. ken ISECO Director Tirso “Bong” Savellano.


Daytoy a gatad ket kiniddaw ti Hunta Direktiba ti nasao a kooperatiba nga idauluan ni Chairman Sadac babaen iti resolusion nga insubmiterda  iti Opisina ni Diputado Ryan a kas paset iti counterpart ti LGU-Cabugao  nga idauluan  ni Mayor Ediboy iti pannakagatang ti Farm Tractor (Massey Ferguson, 90 Horsepower) a mausar dagiti mannalon iti Cabugao babaen iti panangmanehar ken panangmantener ti nadakamat a kooperatiba.

Gapu itoy, manamnama   iti pannakaited  ti nadakamat a makinaria iti kooperatiba   babaen ti opisina   ti DA-RFU 01 nga idauluan ni OIC Regional Executive Director Renato A. Maguigad. 

Indauluan ni Mayor Ediboy ti panagyamanda ken ni Diputado Ryan ket naibagana nga umuna a mapasamak daytoy a maited a proyekto kadagiti organisasion ti mannalon. Innayon ti Mayor nga ipateg ken taripatuenda koma  daytoy a makinaria tapno napaut ti usarna ken pakabigbigan ti panangikalikagum ken panangisakit   ti Diputado iti kasapulan dagiti mannalon iti ili.

Nagkumit met ni Chairman Sadac agraman dagiti kakaduana nga opisiales ti Turod Multipurpose Cooperative a  mantenerenda a kas kapatgan a ramitda tapno maannurotda iti umisu a pakaisangratanna.

 
Iti sabali a bangir, inimatangan  pay ni Diputado Ryan a kaduana ni Mayor Ediboy  iti pannakaited ti 100 a monobloc chairs ken uppat a lamisaan manipud iti opisina ti Diputado  a mausar a  para kadagiti bumarangay iti  Barangay Bato, Cabugao, Ilocos Sur babaen iti panangawat ni Brgy. Captain Santos Aquino, Jr. iti dayta met la nga aldaw.# (Insurat ni JOED SABIO SAJONIA/ab photography)

No comments:

Post a Comment