Saturday, November 26, 2011

NAYON NGA HDPE TUBE, INTED NI DIPUTADO RYAN ITI BRGY. ARNAP

Cabugao, Ilocos Sur – Idi Nobiembre 24, 2011, sinabat dagiti opisiales ken lumugar  ti Barangay Arnap nga idauluan ni Kapitan Teodoro Tabula ti bagon a nagkarga iti 17 a rolyo ti High Density Polyetylene Tube (HDPE Tube),  60 metros ti kaatiddogna a nayon ti inted ni Diputado Ronald V.  Singson idi Setiembre 23, 2010 tapno makompleto ti mainstolar a pamaltuadan dagiti bumarangay iti mainum a danumda.

Daytoy a proyekto ket impaay ni Diputado Ryan Luis V. Singson, kabsat ni nag-Diputado Ronald V. Singson.


Iti sumuno nga aldaw, Nobiembre 25, 2011, simmangbay  ni Diputado Ryan agraman ti grupona iti Barangay Arnap  ket binayabay ida  dagiti opisiales ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno iyawatda daytoy a proyekto kadagiti lumugar babaen kadagiti opisiales nga idauluan ni Brgy. Captain Teodoro Tabula.

Nagyaman ti Kapitan ken dagiti kameng ti Konsehona kada Diputado Ryan ken Mayor Ediboy  iti naited a proyekto. Inulit ti Kapitan nga imbaga ti panangipategda ken panangaywanda  kadagitoy a naited a pagnam-ayanda kadagiti kalugaranna. Imbatad pay ni Kapitan Tabula a nabuslon  ti panagayat ti Pamilia Singson ti barangayda agsipud ta ni met laeng  Gov. Luis “Chavit” Singson ti nangted ti sigud a  tubo ti gripoda ditoy a barangay.


Kalpasan a nayawat ti proyekto, naaramid ti panagsalsaludsod dagiti taga-Media kas iti pannakabagi ti DWRS Commando Radyo, CORE TV kada Mayor Ediboy ken ni Diputado Ryan.

Ti panamagkakamang ti kalsada ken pannakasementoda ti kapatgan nga imbaga ni Mayor Ediboy. Ken pannakaaramid pay dagiti  dadduma pay a nasken a proyekto para kadagiti umili. Binigbig met  ti Mayor dagiti proyekto a naited ni Diputado Ronald iti ili a Cabugao  kasta metten ti panangitultuloy a pannangted  ni Diputado Ryan.

 
Imbatad met ni Diputado Ryan nga adu pay  ti proyekto nga umay iti Umuna a Distrito. Kangrunaan a dinakamat ti Diputado ti pannakasemento dagiti kalsada, computers a maited kadagiti pagadalan, pannakapasayaat ti pagdagusan dagiti Surfers idiay Barangay Sabang a pangatrakar ti Turismo, pannakaidur-as ti Airport ti Vigan City tapno maakomodar dagiti dadakkel nga airlines kas iti PAL  ken panamagbalinna nga umuna nga  Economic Zone santo  Freeport Zone ti Port Salomague. Innayon pay ti agkabannuag a Diputado a dagitoy ti kangrunaan nga itrabahona idiay Kongreso ken opisina ti Philippine Economic Zone Authority (PEZA) tapno naan-anayen  a maited ti panagdur-as ti Umuna a Distrito.


Naisaruno ti pananggetteng ni Diputado Ryan ti laso a mangipalnaad ti mabalinen a   pannakausar ti baro a kalsada a nakongkreto iti Barangay Pila a no sadino a ditoy ket nagatendar dagiti opisiales ti Barangay nga idauluan ni Kapitan Romeo Galamgam.

Binayabay da Vice Mayor Danny Q. Gazmen, ABC President, Rizal Brgy. Captain Teddy U. Soller, Kapitanes ken lumugar  ni Diputado Ryan kabayatan nga iyawatna kadagiti lumugar daytoy a kalleppas a proyekto. # (Insurat ni JOED S.   SAJONIA/Rinetrato,  ab/photography)

No comments:

Post a Comment