Sunday, November 13, 2011

CABUGAO NHS, NAPILI ITI 59 A NHS A NAKAANGAYAN TI DIVISION SECONDARY SCIENCE QUEST 2011.

Cabugao, Ilocos Sur  -  Napili ti Cabugao National High School, Brgy. Turod, Cabugao, Ilocos Sur a nakaangayan ti dua nga aldaw (Nobiembre 10-11, 2011) a  Division Secondary Science Quest a nagpartisiparan ti 59 a pageskuelaan-sekundaria iti intero nga Ilocos Sur.

Iti umuna nga aldaw, umabot iti 788 laeng ti estudiante a nagrehistro/nagtitipon malaksid kadagiti mangisursuro, opisiales ti DepEd (District ken Division), Barangay Officials, bisita ken nagbuya iti Multipurpose Building ti nasao a pageskuelaan.

Nangted ti panglukat a sarita ni Mrs. Felipa B. Asuncion, School Principal 2, Cabugao NHS (Host School) ket impeksana ti ayatda a mangsangaili kadagiti delegado ti nadumaduma a haiskul ti Probinsia.

 

Simmaruno a nagsarita ni SB Member Vicky S. Serna, Chairman, Committee on Education  (Host Municipality) ket dinakamatna ti pateg ti aktibidad ken pakaidayawan ti ili a mangpasangbay ti kakastoy a dadakkel a taripnong iti DepEd. Indanonna ti  kablaaw ti Ama ti Ili, Mayor Edgardo “Ediboy” S. Cobangbang, Jr. ken panangbigbigda a dakkel a balligi  iti pannakapili ti Munisipalidad a pagtitiponan dagiti addaan sirib  a mangidur-as ti  siensia.

Kimmablaaw ken nagyaman met ni Brgy. Captain Inocencio Sadac kadagiti amin  a   timmalantan kadaytoy a panagtitipon.

Kalpasan ti intermission number, impresentar ni Mr. Jaime D. Campos, Jr., (Sinait NHS), President, ROSCA (Ilocos Sur Chapter) dagiti delegado ti nadumaduma a pageskuelaan. Naggiddan a pinagsapata ni Mr. Romeo Berzabal, Education Program Supervisor 1 dagiti Region One Youth Science Club (ROYSC) Officers ken Region One Science Club Advisers (ROSCA) Officers.

Imbatad ti Mr. “Big Man” ti Science Club a paborito unay ti DepEd ti ili a Cabugao a pakaang-angayan dagiti dadakkel nga aktibidadna a kas itoy. Dinayawna ti kinapintas ti ili  ken  kinamanagsangaili dagiti umili ken dagiti opisiales  nga idauluan ni Mayor Ediboy S. Cobangbang, Jr. Innayon pay  ni “Big Man”  a ti   panagadal  imbes a panagpiesta  ti kaipapanan ti aktibidad: tunggal delegado adda imetna a saririt  a mangnayon ti gapuanan ti Siensia. Dinakamat pay  ti opisial ti kaipapanan ti kinaparbeng iti amin a balligi a matun-oyanda.

Panagbalbaliw ti panawen ken no kasano a yataday ti kabaelan ken kasasad iti tao ti  ramen ti balikas ni Dr. Marino S. Baytec, Ed. D., CSEE, Schools Division Superintendent iti mensahena kadagiti delegado. Dinayawna dagiti mangisursuro  ti Cabugao NHS ken ti aglaplapusanan a  suporta ti Gobierno Munisipal iti pannakaisayangkat daytoy nga aktibidad. 

Kamalmanna, naaramid ti Canvassing ti Popularity Contest ti Mr. & Mrs. Division Science Quest 2011. Naigannuat ti Science Quiz, Oration, Essay, Poster, Collage Making/Scrap Art. Karabiyanna,         nakoronaan ti Mr. & Ms. Division Science Quest 2011 nga isuda: Jonathan Raquel ken Angel Marie Cris Ornos. Da met Angelica Tinaya ken . 2011 ken Mr. Kalikasan 2011 kas panagsaganadda.

Iti maikadua nga aldaw, nagatendar ni Hon. Gemma Q. Tacuycuy, Assistant Schools Division Superintendent (Secondary) iti closing program.

Ni Mayor Ediboy ken dagiti grupo ti deligasion ti Sinait National High School nga kaaduan kada kuada ket taga Cabugao met laeng
Dinayawna ti impamatmat ti Cabugao NHS ken LGU-Cabugao a nangakomodar kadaytoy a pagteng. Panagbalaw, panagtignay, panagadal ken panangipatungpal iti wagas a makasalbar ti nakaparsuaan ti anag ti mensahena kadagiti delegado.

Kabayatan a mayaw-awat dagiti medalia ken tropeo dagiti nangabak,  dimteng ni Mayor Edgardo “Ediboy” S. Cobangbang, Jr. a kaduana ni Brgy. Captain Inocencio Sadac. Nagmensahe ni Mayor Ediboy ket inapresiarna ti pasnek ken regta daqiti delegado a nangigannuat ti aktibidad ken kinablaawanna amin dagiti nangabak. Dinakamatna ti pannakabuangay ti Sisim National High School a nainayon kadagiti sekundaria ti ili a Cabugao. Naragsakan ti Mayor ta impateg ken binigbig  met  dagiti nagatendar dagiti  pannarabay ken tulong ti Gobierno Munisipal iti panagballigi ti panggep daytoy nga  aktibidad. # (Rinetrato ken insurat ni JOED SABIO SAJONIA)

Dagiti over-all winners:
RANK
SCHOOL
Champion
Sinait National High School
1
Tagudin National High School
2
Narvacan National High School
3
Lussoc National High School
4
Magsingal National High School


No comments:

Post a Comment