Cabugao, Ilocos Sur – Naangay ti Multisectoral Meeting a buklen dagiti Kapitanes iti Coastal Barangays, pannakabagi ti DENR-CENRO-PAWCZMS-CMMD,LGU ken NGO tapno maistudiar ti sinaguday ti Executive Order 553 a nangiyetnag ti umisu a suroten ti pannakatagiben ti agpada a kabambantayan, karayan ken kabaybayan tapno matun-oyan ti balanse a kasasaadda ket agbalin dagitoy a pakairanudan ti umili.
Mismo a ti Ama ti Ili, Mayor Edgardo “Ediboy” S. Cobangbang, Jr. ti nangted ti pakaammo sakbayna kadagiti maseknan a katulonganda nga agplano ket maangay ti Preliminary Orientation iti Nobiembre 22, 2011 iti Municipal Conference Hall.
Linuktan ni Paulino F. Tabut, Coastal and Marine Management Chief Unit, DENR-CENRO, Vigan City ti panagiinnadal.
 |
| Ni Paulino F. Tabut, Coastal and Marine Management Chief Unit, DENR-CENRO, Vigan City |
Immuna a naglektiur da Graziel Harvae Gonzales ken tinulongan ni Analyn Viray, Staff ti Coastal Marine Management Division (CMMD) pakaseknan ti EO 553 a nabukel idi panawen ni Nag-Presidente Gloria M. Arroyo. Sinaguday ti nasao nga order ti panamagbalin nga Integrated Coastal Management gapu ta karaman aminen dagiti makaigapu ti pakaseknan manipud iti bantay, karayan agingga iti baybay.
 |
| Ti panaglektuir ni Ms. Graziel Harvae Gonzales |
Nagpaay a Moderator iti planning session ni Marizel Calpito, Chief, Coastal and Marine Management Division (CMMD) ti DENR-Region 1. Naibinsabinsa iti agdama a parang ti nakapay-anen ti kabambantayan, karayan ken baybay a mangapektar iti nabiag kadagitoy a rekursos naturales ket maaramidan ti mainayon a panangprotektar babaen ti panangadal kadagiti isyu (agdama a problema iti Munisipalidad pakaseknan itoy) babaen iti mabukel a plano nga ipatungpal iti multisektoral a gannuat.
 |
| Ni Marizel Calpito, Chief, Coastal and Marine Management Division (CMMD) ti DENR-Region 1 |
Iti planning-workshop, nabingay dagiti nagpartisipar iti dua a grupo: ti pakaseknan ti patad ken kabaybayan. Manamnama a maipinal ken mabukel para iti pannakaiyimplimentarna iti kabiitan a panawen.
Nagatendar met da ABC President Teddy U. Soller, ABC Vice President Edgardo S. Cobangbang, Sr., MPDC Florante Jara, Budget Officer Marietta Cruz, MENRO Edgar S. Balangatan ken dadduma pay a pannakabagi ti DA-LGU.
 |
| Dagiti nagpartisipar iti nasao a Multisectoral Meeting |
Iti biang ti DENR-CENRO, Vigan City, nakipaset met da Rodolfo Costales, Watershed Management Officer ken Jaime Sonido, Sr., Information Officer.
Ti CENRO Regional Office Working Team ket pasetda iti Protected Areas, Wildlife and Coastal Zone Managemnent Service ti DENR a nakabase sadiay San Fernando City, La Union. # (Insurat ni JOED SABIO SAJONIA/Rinetrato, Alvin S. Solis)
No comments:
Post a Comment