AGLATLATAK DAGITI PWD’s TI ILI A CABUGAO!

Cabugao, Ilocos Sur – Kalpasan ti pannakagaw-at ti Hall of Fame Award ti Person with Disability (PWD’s) iti Barangay Bonifacio nga idauluan ni Mr. Dante Ullero, sinublat ti Brgy. Daclapan PWD’s ti kinakampeonato iti salip ti Siglat Awards 2014. 

Dagiti sumaganad ti gapuanan ken pammadayaw a nagun-od dagiti PWD’s a nakairagpatan met ti Barangay Daclapan agraman kadagiti seminar ken panagsanay nga inatendaran dagiti kameng  ken ti panangpapintasda iti rekord ken kasasaad ti asosasion-da iti barangay: 

MATARAKEN A KALDING, NAITED KADAGITI PWD’s

Nai-turnover ti 55 a Kalding kadagiti 55 a Benepisiario iti Proyekto a “Goat Production and Management”  ti  Federation of Persons with Disability-Cabugao nga idauluan ni Mr. Dante Ullero, Federation President ket naangay iti panangallawatda kadagitoy a mataraken a dinguen iti arubayan ti Cabugao Dayo, Brgy. Baclig, Cabugao, Ilocos Sur idi Pebrero 25, 2014.

Tinarawidwidan ni MSWD Officer Mrs. Lydia S. Gazmen iti pannakaited dagiti nasao a kalding a kaduana ni Mrs. Jenelyn Castillo, JO iti MSWDO.

Inimatangan met ni Vice Mayor Deogracias Jose “DJ” H. Savellano a nangibagi ken ni Mayor Edgardo “Ediboy” S. Cobangbang, Jr. iti pannakaiyallawat dagitoy a mataraken a kalding kadagiti Recipients ti PWDs-Cabugao.

Ti nasao a proyekto ket nagbuligan nga impaay ti Department of Labor and Employment (DOLE)-Vigan City babaen iti panangirepresentar ni Mrs. Charity A. Ubilas, DOLE-ISFO ken ti LGU-Cabugao nga idauluan ni Mayor Edgardo “Ediboy” S. Cobangbang, Jr.

Iti pannakiuman ti Web In-Action iti daydi  a petsa, impeksa ni Mr. Dante Ullero agraman dagiti kakaduana a Recipients iti nalaus a panagyamanda iti LGU-Cabugao nga idauluan ni Mayor Ediboy kasta met kadagiti Opisiales ti DOLE-Vigan City  ta agtultuloy a maikkanda iti pateg ken tulong tapno maan-anay iti panangpasayaatda iti kasasaadda a PWDs.

TRAINING TI MEAT PROCESSING, NAKIRAMAN TI PWD MEMBERS

Babaen ti awis ti Department of Trade and Industry (DTI)-Ilocos Sur Provincial Office nga idauluan ni Provincial Director Grace R. Lapastora, CESO V, nakipartisipar dagiti kameng ti Federation of Persons with Disability-Cabugao nga idauluan ni Mr. Dante D. Ullero iti Basic Skills Training on Meat Processing idi Nobiembre 20, 2012 iti DTI Ilocos Sur Provincial Office, Vigan City.

Kalpasan ti training, nagturong ti grupo ni Mr. Ullero iti Opisina ni Mayor Edgardo “Ediboy” S. Cobangbang, Jr. ket naaramid ti dialog-da iti Ama ti Ili iti tulongna a  pannakai-follow up dagiti kiddaw ti  Pederasion ken pinagyamanan dagiti kameng ta sisusuporta ni Mayor Ediboy  iti pagsayaatan ti asosasionda.

Ti Federation of Persons with Disability-Cabugao ket rehistradon  iti Department of Labor and Employment (DOLE). 

Ti Barangay Daclapan-PWD’s iti simmublat a nakisalip iti Siglat Awards 2014 ket naiyalatna ti kinakampeonato.

SIGLAT AWARDS 2014
Champion
Best in PWD Program Implementation. # (Web In-Action)