SAGAYADEN FREE FARMERS MPCI, NADUR-AS A KOOPERATIBA

Cabugao Ilocos Sur –Maysa ti Sagayaden Free Farmers MPCI kadagiti benepisiario idi iti naaprobaran nga alokasion   ti Financial Assistance kadagiti Non-Government Organizations (NGO’s) ken Kooperatiba  nga impaay  ti   Gobierno  Munisipal nga idauluan ni Mayor Edgardo “Ediboy” S. Cobangbang, Jr. idi Enero 21, 2013 ket inawatda dagiti nabatayanda iti mismo a Munisipio.

Panggep ti LGU  a tulongan dagitoy a grupo wenno indibidual a maisalinong iti Kooperatiba iti benneg ti produksion    tapno pumigsa ti purchasing power  dagiti maseknan a mannalon   ket magatangda ti kayatda nga  ag-translate iti pannakapapigsa ti ekonomia ti ili.

Dagiti asosasion a recipients iti Financial Assistance ket dagiti sumaganad:  Sagayaden Free Farmers Multi-purpose Cooperative; Cael-layan Farmers; Turod Multi-purpose Cooperative; Namnama Trading Center;  ken Arnap Sunrise MPC.

Dadduma pay nga aktibidad ken proyekto ti Sagayaden Free Farmers MPCI ket dagiti sumaganad: 

1. Naangay ti Thanksgiving ken Turnover Ceremony ti Flatbed Dryer iti Sagayaden Free Farmers Multi-purpose Cooperative iti Barangay Sagayaden, Cabugao, Ilocos Sur idi Enero 23, 2013  ket  ni madama pay la idi a Diputado Ryan Luis V. Singson ken ni Mayor Edgardo “Ediboy” S. Cobangbang, Jr.  ti nanginagorar kadaytoy a post-harvest facility.

Impeksa idi ni Congressman Ryan Luis V. Singson  ti iliwna kadagiti umili ti Cabugao babaen iti pannakitabunona  iti kakastoy nga awis ta ibilbilangna metten a kakailianna  iti nakaikamanganna a lugar. Imbinsa ni   Diputado Ryan  ti pateg ti RA 7171 nga imputar a linteg  ni Governor Chavit  idi nag-Diputado met isuna. Nupay sapasap a sangaprobinsiaan ti agbenepisiar itoy ket iramanda latta a maikkan ti pundo ken proyekto dagiti mannalon, mangngalap ken  sektor  iti ili a  Cabugao.

Iti Turn-over, nagsarita idi ni Mrs. Visitacion Mendoza, pannakabagi ni DA Regional Executive Director Valentino  C. Perdido, Ph. D.  Dinayaw ni Mrs. Mendoza ti napintas a kammayet ti LGU ken dagiti asosasion ti Cabugao a manggun-od kadagiti programa ken proyekto  iti DA. Inyallawatna ti pakabuklan ti proyekto kadagiti opisiales ti kooperatiba nga idauluan da Mr. Zosimo Sayaboc, Manager ken ni Mr. Ferdinand Anor, Chairman, FFMPC  iti imatang ni Mayor Ediboy, Vice Mayor Danny Q. Gazmen, SB Member Carlos V. Sison ken Opisiales ti DA (OPAG ken Region) kasta pay dagiti kameng ken Opisiales ti Kooperatiba.

2. Idi Marso  15, 2013, naangay ti 
maika-16 a General Assembly Meeting ti Sagayaden Free Farmers MPCI ket ginetteng ni Mayor Ediboy ti laso (Cutting of Ribbon) iti pannaka-renovate ti pasdek ti Sagayaden Free Farmers MPCI a binayabay ni Municipal Agriculturist Zenaida S. Andrada  ken ti  pannakabagi ti Land Bank ken inimatangan dagiti Opisiales ken miembros ti kooperatiba, Opisiales ti Barangay ken lumugar iti Sagayaden Norte.

Imbinsa idi ni Mayor Ediboy iti pateg ti panagbalin ti Sagayaden Free Farmers MPCI nga ehemplo ken tuladen ti dadduma a kooperatiba ken asosasion  iti napintas a pagbanagan dagiti kiniddawda a proyekto. Daytoy a kooperatiba ti nangipadalananda kadagiti soft loans a naited ti LGU kadagiti mannalon kas mayannurot iti paglintegan ti Gobierno-Nasional.

SIGLAT AWARDS 2014
Champion
Outstanding Barangay Based Cooperative 

SIGLAT AWARDS 2013
Champion
Outstanding Barangay Based Cooperative 

SIGLAT AWARDS 2012
Outstanding Barangay Based Cooperative-1st Runner-up

SIGLAT AWARDS 2011
Outstanding Barangay Based Cooperative. # (Web In-Action)