Cabugao, Ilocos Sur – Naluktan ti 2015 Cabugao Basketball Tournament idi Marso 15, 2015 babaen iti Parada a naaramid iti aglikmut ti Poblasion a nagpartisiparan dagiti Basketball Players iti nadumaduma a Barangay, Coaches, Game Officials ken Marching Band ti Cabugao Institute, Cabugao North Central School ken ti Cabugao South Central School ket nangrugi iti Parada iti Cabugao Cultural and Sports Complex, Brgy. Rizal, Cabugao, Ilocos Sur a disso ti pagdidinnayoan.
Iti Opening Program, indauluan ni Brgy. Captain Nida S. Braceros ti Brgy. Quezon iti Invocation ken natokar ti Musika ti Pambansang Awit ken Cabugao Hymn babaen iti Marching Band ti Cabugao South Central School.
Simmaruno ti Welcome Remarks ni SBM Atty. Bryann Jett S. Pano, Committee Chair on Sports ket inawisna ti imatang dagiti umili a mangbuya kadaytoy a kangrunaan a parang/pagteng ti sports nga aramiden dagiti umaayam iti barangay.
Innayon ni SBM Pano a daytoy a paay-ayam ti LGU-Cabugao ket panggepna nga ital-o ti bileg ti sports, napintas a panaglalangen, kooperasion, panagkaykaysa a kangrunaan a timon iti agtultuloy a kinaragsak ken panagprogreso dagiti umili ti Cabugao.
Imbasa met ni Mr. Kevin Somera, pannakabagi ti Office of the Mayor iti Tournament Guidelines ken dagiti nagan ti Team ken barangay nga agpartisipar.
Naisaganad ti panangited ni Vice Mayor DJ Savellano ti Mensahena kadagiti agsasalip.
Kimmablaaw ken nagyaman ni Vice Mayor Savellano kadagiti agsasalip ken kasta metten kadagiti amin a naitaripnong iti Sports Complex.
Imbinsa ni Vice Mayor DJ ti pateg ti partisipasion dagiti agtutubo iti pannakairubuat dagiti aktibidades a mangparagsak iti panagpiesta ti ili.
Impeksa pay ni Vice Mayor DJ ti ragsakda nga Opisiales ti ili iti panangidaulo ni Mayor Edgardo “Ediboy” S. Cobangbang, Jr. nga iti mabuybuyada a tunos dagiti agtutubo ket maisarming dagiti tagipatgen a kaugalian ti umili iti Cabugao ket maiyallatiwto met kadakuada iti respeto nga agbalin a lideres iti masanguanan nga aldaw.
Ingunamgunamna iti pannakamantener koma ti sportsmanship dagiti umaayam para itoy a torneo kabayatan iti salip.
Binigbig pay ti Bise Mayor iti inisiatiba dagiti nangorganisar/agpartisipar kadagiti Team a makisalip kas pannakidanggayda iti panggep ti Gobierno Munisipal a mangparagsak ti panagpiesta ili.
Naisaruno a naibasa ti Oath of Sportsmanship babaen ken ni Mr. Jeff Asuncion, Basketball Player ti FIT BONIFACIO TEAM.
Naaramid ti miting dagiti Coaches ken Referees para iti Game Rules babaen kadagiti Opisiales a mangimaton iti paay-ayam sakbay a napasamak ti Ceremonial Toss ti bola iti nagbaetan dagiti Basketball Player ti Brgy. Salapasap ken ti Brgy. Namruangan nga umuna nga agay-ayam nga inimatangan dagiti Opisiales ti LGU-Cabugao ken Kakapitanes a naitaripnong ken kasta pay iti sapasap a nagbuya iti uneg ti Sports Complex.
Nakikaysa met dagiti Kapitanes ti Barangay a naitallaong nga idauluan ni ABC President, Brgy. Captain Thaddeus “Teddy” U. Soller.
Nag-Emcee ni Mr. Dario Roy Siruno ti LGU-Cabugao. # (Web In-Action)
No comments:
Post a Comment