Iti pannakatungpal dagitoy nga arapaap ti Barangay Turod ket napasamak iti nagsaganad a pannakagun-odda:
Idi Enero 24, 2012, nabendisionan ti baro a Tractor (Massey Ferguson, Multifunction Tractor) iti Turod Multipurpose Cooperative babaen ti panangannong ni Rev. Fr. Felicisimo “Rudy” Ferrer, Kura Paroko ti ili a Cabugao.
Naaramid ti programa ti panagyaman ti Turod MPC nga idauluan ni Brgy. Captain Inocencio Sadac iti Barangay Multipurpose Hall iti dayta met la nga aldaw a no sadino a ditoy ket nagatendar dagiti bumarangay, dagiti mangisursuro iti Turod Elementary School ken Cabugao National High School, kasta metten dagiti empleado ti Kapitolio a nangbayabay ken ni madama pay la a Diputado Ryan Luis V. Singson, dagiti empleados ti LGU Cabugao nga idauluan ni Mayor Edgardo “Ediboy” S. Cobangbang, Jr. ken dadduma pay nga opisiales ti nadumaduma nga Ahensia.
Nakikaysa met idi da Vice Mayor Danny Q. Gazmen, SB Member Vicky S. Serna, SBM Josefina S. Vallejo, SBM Dr. Carlito S. Pano, SBM Richard T. Alcid, SBM Benedict M. Savellano, ABC President, Rizal Brgy. Captain Teddy U. Soller ken ni Kapitan Danny Garcia ti Barangay Dardarat.
Iti anag ti mensahe ni Mayor Ediboy, nagyaman iti dakkel a tulong ken agtultuloy a panangtedna ti proyekto para kadagiti mannalon ken iti umili ti Cabugao ni Diputado Ryan Luis V. Singson ti Umuna a Distrito. Kimmablaaw ti Alkalde ken dinayawna ti kinatunos dagiti kameng ti Turod MPC a pagwadan ti dadduma nga asosasion. Nupay kasta, binigbigna ti akem ti Sangguniang Bayan a katinnulongna a mangpaadda iti “equity” iti kiddawen dagiti dadduma nga asosasion ti mannalon a makinaria a para iti pagsayaatanda. Pammaneknek ti lima nga asosasion ti mannalon a nakaawat iti nabiit iti makinaria babaen iti 85-15 % Equity Scheme iti Farm Mechanization Program ti DA.
Iti panagsarita ni Diputado Ryan, dinakamatna ti naan-anay a panangilungalong ni Mayor Ediboy kenkuana dagiti proyekto a para iti ilina ken dagiti mannalon. Imbatad ni Diputado Ryan a nupay iprayoridadna dagiti maidatag a kalikagum kenkuana iti Kongreso, dinto agsardeng a tumulong kadagiti imbilangna a kalugarannan iti ili a Cabugao ken iti benneg ti Agrikultura agsipud ta dagitoy ti naipanawen a kasapulan ita ti kaaduan a mannalon a kaprobinsiaanna iti Ilocos Sur partikular iti Umuna a Distrito.
Imbaga met idi ni Provincial Agriculturist Teofilo Quintal iti panagsaritana a gundawayan dagiti mannalon iti Farm mechanization ken maited a post harvest facilities a programa ti Department of Agriculture (DA) agingga iti 2016. Innayonna nga aggapu ti inisiatiba iti asosasion ti mannalon ket no mangtedda ti resolusion, kasapulan met a nakasaganan ti asosasion agsipud ta agdalan met iti ebaluasion. Imbagana pay ti pannakapapigsa koma ti Ilocos Sur Cooperative Bank babaen iti pannakikaysa ti sapasap a makipagpuonan tapno adda pagbulodan dagiti mannalon.
Kalpasan ti programa, ginetteng ni Diputado Ryan ti ribbon a mangipalnaad ti pannakaisibro ti traktora ken binayabay da Mayor Ediboy, madama idi a Vice Mayor Danny Q. Gazmen, dagiti kameng ti Sangguniang Bayan a nagatendar, ISECO Director Tirso “Bong” Savellano, opisiales ti Turod MPC ken Barangay Turod ken dadduma pay nga opisiales ti Ahensia a naitaripnong.
Idi met Mayo 8, 2013, imbatad ni Brgy. Captain Inocencio S. Sadac ti Brgy. Turod, Cabugao, Ilocos Sur a naipasdeken ti pakabuklan ti baro a Barangay-Hall-da a naisaad iti abay ti Multi-purpose Building-da iti barangay.
Daytoy a proyekto ket nagbuligan nga impatungpal ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken ni madama idi a Diputado Ryan Luis V. Singson ti Umuna a Distrito ti Ilocos Sur.
“Dakkel a pagyamyamananmi kadagiti Opisiales a nangilungalong ti pannakaadda daytoy a pannaka-Munisipio ti Barangay-mi,” imbatad idi ni Kagawad Edgardo Garcia ti Barangay Turod. “Agtultuloy ken naynayonanmi pay ti panagtutunosmi.”
Dagitoy a nangrugian a nagprogresuan ti barangay ket ginubuay ti nakammayet ken natunos a pannakinamingda kadagiti benneg ti Gobierno kas iti LGU-Cabugao ken ti DA-RFU 1 a makaipaay kadagitoy a pagsayaatan ti barangay-da.
Iti salip ti Siglat Awards 2014, nakisalip ti Barangay Turod ket inyalatna ti kinakampeonato ti Outstanding Barangay Tanod:
SIGLAT AWARDS 2014
Outstanding Barangay Tanod
# (Web In-Action)
No comments:
Post a Comment