MANGROVE PLANTING, NAIRUSAT MANEN ITI TALLO A COASTAL BARANGAY

Cabugao, Ilocos Sur – Naangay ti panagmula ti Mangrove Seedlings iti saan pay a namulaan a paset ti  katangriban iti Barangay Salapasap, Salomague ken  Pug-os, Cabugao, Ilocos Sur babaen iti panangilunsad dagiti kameng ti Fishermen Association kadagiti nadakamat a barangay a kas pannakikaysada iti pannakapaberde kadagiti kakadilianan a paset ti Clean and Green Program-Coastal Area  ti  Munisipio nga idauluan ni Mayor Edgardo “Ediboy” S. Cobangbang, Jr. iti tallo a nagsasaganad nga eskediul: Pebrero 24, 2015 – Barangay Salapasap; Marso 3, 2015 – Brgy Pug-os ken Brgy. Salomague; ken Marso 11, 2015 - B arangay Pug-os.

Umabot ti 215,000 a mangrove seedlings ti naimula: Brgy. Salapasap – 50,000 Mangrove Seedlings; Brgy. Pug-os -  115,000; ken Brgy. Salomague - 50,000, segun ken ni Mrs.  Milagros R. Paz, Municipal Fisheries Coordinator a nangtarabay kadagiti mangrove planters. 

Kabayatanna, maibatay iti report ni Mrs. Paz, umaboten ti 215,000 a mangrove seedlings ti nainayon a naimula ita a Tawen 2015  iti shorelines a mabatogan dagiti nadakamat a tallo a barangay a disso ti estratehiko a mabalin a mulaan ti mangrove seedlings.

Kabayatanna, regular met a maar-aramid ti coastal clean-up nga igaygay-at  dagiti multi-sectoral associations  iti  uneg dagiti nadakamat a barangay tapno mabisita, madalusan ken masugotan dagitoy a namulaan ti mangrove a parte ti kabaybayan, segun ken ni MENRO Edgar S. Balangatan, AT ti LGU-Cabugao.

Innayonna a masirmata a kalpasan ti lima a tawen, agminarton ti pintek dagiti maimula a mangrove ket iti panagkasamekan ti katangriban iti sumagsaganad a tawen ket masalakniban  dagiti agnanaed iti igid ti baybay iti après ti danum-baybay  no agbagyo ken agresulta ti napintas a pamataudan ti pagbiag dagiti agindeg kadagitoy a barangay ta agbalinto a sanktuario ti ikan ken billit dagiti dadakkelton a mangrove trees.

Dagitoy nga aksion ken inisiatiba ket gubuay ti nakammayet a panagtutunos ti amin a sektor a mangpaberde ti katangriban babaen iti panangilungalong ti Gobierno Munisipal nga idauluan ni Mayor Ediboy ken ti BFAR-Region 1 tapno maprobitsar dagiti proyekto ken programa ti nasao nga Ahensia iti pagsayaatan dagiti agindeg iti coastal barangays ti ili. # (Web In-Action)