Tuesday, March 3, 2015

FAMILY DEVELOPMENT SESSION TI 4 P’s, MAYSA A TOPIKO TI TUNGGAL BULAN

Cabugao, Ilocos Sur –Agtultuloy  ti pannakaaramid ti  Family Development Session (FDS) iti Pantawid Pamilyang Pilipino Program (4 P’s) kadagiti 33 a Barangay ti ili a Cabugao, Ilocos Sur iti Tawen 2015 ket narugian manen ti sabali a topiko iti bulan ti Marso a napauluan iti: “Pangangasiwa ng Stress”  nga itden ti Civil Society Organization ti North Luzon Bible Baptist Church, Sinait, Ilocos Sur.

Daytoy ket isaysayangkat ti Municipal Operations Office ti 4 P’s-MSWDO Cabugao a buklen ti Team A ken Team B nga idauluan da Ms. Jessie Ann O. Tabut ken ni Ms. Rosemarie C. Pespes kas panagsaganadda ken babaen iti panangtarabay ni MSWD Officer Mrs. Lydia S. Gazmen.

Umabot ti dua agingga iti tallo a Barangay ti maileppasda a pagmitingan iti tunggal aldaw. Kinuna ni Miss Aida S.  Cueto, Municipal Focal Person ti 4 P’s ket maangayto ti miting ti Municipal Advisory Committee (MAC Meeting)   ti Pantawid inton Marso 11, 2015 nga idauluan ni Mayor Edgardo “Ediboy” S. Cobangbang, Jr. tapno agtultuloy a mataming dagiti kangrunaan nga aspeto ti programa para iti serbisio a maipaay kadagiti 4 P’s iti ili a Cabugao, Ilocos Sur.

Daytoy a pro-poor program ti LGU-Cabugao ken ti DSWD ket agtultuloy a maipatungpal kadagiti kualipikado a Benepisiario iti 33 a Barangay ti ili a Cabugao, Ilocos Sur. # (Web In-Action)

No comments:

Post a Comment