UMDAS A SUPLAY TI NATENG ITI NISTC PUBLIC MARKET, MAMANTENER

Cabugao, Ilocos Sur – Saan a mapasamak ti panagkirang ti suplay a nateng iti NISTC Public Market ita a bulan maigapu ta adda latta maprodukto dagiti Off-Season Planters nangruna iti lugar a masasao a “Vegetable Bowl” ti ili nga isu ti Brgy. Salapasap ken kasta met kadagiti dadduma pay a barangay a naed dagiti mannalon a natenneben nga agmula ti nateng.

Iti binigat  a panagbisita ti Web In-Action iti Tiendaan ti Cabugao, naregta ken nasapa a mapan aglako dagiti Vegetable Vendor and Traders iti partena  a masakupanda iti Tiendaan. Malaksid kadagiti maimulmula a cash crops nga adda met awan ti  klasena gapu ta rugrugida pay laeng a nagimula ket nawadwad ti suplay dagiti mainayon a pagbiag a magatang.

Imbatad ti kaaduan kadagiti aglaklako a saan a problema  ti presio ti nateng ta mabalanse maigapu kadagiti  maapit iti Off-Season ken nasaknap iti Backyard Gardening a programa ti LGU-Cabugao kadagiti sektor a maseknan iti pagtaraon.

Kabayatanna, innayon dagiti Vegetable Vendors nga adu pay  ti nateng nga aggapu iti ili ti Sinait ken San Juan a mangbalanse no kaspangarigan bumassit ti suplay iti merkado. 

Dagitoy nga aksion ken inisiatiba ket resulta iti nasaknap a programa ti Gobierno Lokal iti Vegetable Production babaen iti panangimaton ti High Value Crop  Development Program (HVCDP) a pagkamkammayetan ti LGU-Cabugao ken ti DA-RFO 1. # (Web Situational Report)