Cabugao, Ilocos Sur – Nagtitipon dagiti Opisiales/Kameng ti 4-H Club iti nadumaduma a barangay ti ili a Cabugao, Ilocos Sur idi Marso 4, 2017 iti Rizal Park, Brgy. Rizal, Cabugao, Ilocos Sur tapno mareorganisarda.
Nagatendar ti 19 nga 4-H Club Member/Officer a pannakabagi ti 16 a barangay iti naawis iti umuna a panagtitiponda iti Tawen 2017.
Naawis ni SBM Atty. Randy Baniaga G. Kinaud, Committee Chairman on Agriculture and Cooperatives a makasakup iti pakaseknan ti 4-H Club ket nangipaay ti mensahena kabayatan iti miting.
Kimmablaaw ken nagyaman ni Konsehal Kinaud ta makatakunaynayna dagiti out-of school youth kadagiti barangay ket kunana a ma-update koma ti masterlist dagiti kamengda; mapili dagiti Opisiales; makapagaramidda iti Constitution and By-Lawsda sadanto maakreditar ditoy LGU-Cabugao ken mairehistro iti maiyataday nga Ahensia tapno adda karbenganda a mangkiddaw iti kalikagumanda a tulong wenno proyekto.
Intarapnos a kinasarita da SBM Kinaud ken ni Mr. Baclig dagiti 4-H Club Representatives iti pannakipartisiparda iti “Agriculture Day” a naisibar a para kadagiti mannalon/mangngalap inton Abril 21, 2017 nga umuna nga aldaw a selebrasion iti panagpiesta ti ili iti Cabugao iti Abril 2017.
Kalikaguman pay dagiti Opisiales a maisagana iti kabukbukodanda a pabuya ken iti pannakipasetda iti Grand Parade ken mangangayda ti Picnic iti Agriculture Sector iti dayta a nadakamat nga aldaw-da.
Napagkaykaysaan pay nga adda manen sumaruno a panagtitiponda iti umuna a Lunes ti Abril 2017 a mayeskediul pay laeng a regular meeting ti 4-H Club Federation tapno mapagnanamingan a naan-anay dagiti aktibidades-da iti piesta.
Innayon ni Mr. Obas Bill Y. Baclig, AT, Municipal 4-H Club Coordinator a pabilgenda
dagiti agtutubo a mangipatungpal kadagiti panangikalikagum ti LGU-Cabugao kadakuada a mangpasayaat iti kasasaadda.
Insupusopna nga adda pay 14 a barangay nga organisarenda ken irehistroda sakbay a pormarenda ti Pederasion ti 4-H Club iti Munisipalidad. # (Web In-Action)
No comments:
Post a Comment