Thursday, March 9, 2017

“AGRICULTURE DAY” TI MASELEBRARAN ITI ABRIL 21 INTON PIESTA TI ILI

Cabugao, Ilocos Sur – Naangay ti Regular Meeting ti Federated Farmers  Association ti ili a Cabugao nga idauluan ni Mr. Elmer Guerrero Bromeo  idi Marso 7, 2017 iti Early Childhood Care Development (ECCD)   Building a nagatendaran dagiti kameng/opisiales ti nadumaduma nga Asosasion iti Sektor-Agrikultura iti ili  ken tinarabay dagiti pannakabagi ti DA-LGU nga idauluan ni Municipal Agriculturist Robert S. Savella.

Nakikaysa ni SB Member Atty. Randy Baniaga G. Kinaud, Committee Chairman  on Agriculture ti Sangguniang Bayan ket dinayawna ti kinaaktibo dagiti mannalon ken mangngalap. Babaen ti programa ti Gobierno Munisipal iti panangidaulo ni Mayor Josh Edward  S. Cobangbang kadagiti mannalon ken mangngalap, imbatad ni SBM Kinaud a makikammayet/makitinnulong  met iti pannakaidanon kadagiti serbisio ken  pagsayaatan  a  maited kadakuada.   

Kaaduan a napagsasaritaan ket iti panagsagana dagiti mannalon ken mangngalap iti pannakigamuloda iti umasidegen a panagpiesta ti ili a no sadino a ditoy ket maisangrat ti kaaldawanda  inton Abril 21, 2017 nga awaganda iti “Agriculture Day” tapno mairaman amin nga Asosasion nga adda iti salinong daytoy a sektor a  pakabuklan dagiti kameng ti Farmers and Fishermen Association iti 33 a barangay ti ili; Rural Improvement Club (RIC) ken 4-H Club Association kadagiti barangay   ket agmalmalem-agrabrabii  iti naituding nga aktibidadesda.

Nabukel ti sektor iti innem a Cluster ket napagnanaminganda pay a maangay iti maaw-awagan iti Boodle Fight wenno panagpiknikda iti dayta nga umuna nga  aldaw ti Piesta ti ili.


DAGITI NAGKAKADUA A BARANGAY ITI INNEM A CLUSTER:

Cluster 1 -  Marga-ay;  Turod; Pila; Baclig ken Rizal.
Cluster 2 – Salapasap; Bungro; Pug-os ken Reppa-ac. 
Cluster 3 – Namruangan; Daclapan; Sabang; Salomague ken Dardarat.    
Cluster 4  - Quezon; Bato; Cael-layan; Alina-ay; Catucdaan ken Maradodon. 

Cluster 5 – Arnap; Cacadiran; Nagsantaan; Aragan; Cuantacla ken Carusipan.

Cluster 6 – Turod Patac; Sisim; Sagayaden; Cuancabal;  Bonifacio ken Lipit. 

Napagkaykaysaan pay iti pannakipasetda iti Night Float Parade ken iti pakontes iti Cluster Float iti Grand Parade ket mapilinto dagiti sumaganad: Best Dressed Float; Best in Attendance; Most Discipline;  ken Best Performer.

Napagnunumuan pay iti pannakipasetda iti pannakaiplastar dagiti Booth iti maangay a Trade Fair ti Piesta.  # (Web In-Action)

No comments:

Post a Comment