Cabugao, Ilocos Sur – Naaramid ti pannakabendision ken pannakagetteng ti ribbon a mangipakita iti pannakausar ti Senior High School Building ti pagadalan-sekundaria idi Marso 8, 2017 iti Compound ti Sisim National High School, Barangay Sisim, Cabugao, Ilocos Sur.
Nagatendar dagiti agad-adal, nagannak, lumugar ken naggapu iti kabangibang a barangay nga adda pagad-adalenna iti Sisim NHS iti daytoy a Blessing and Inauguration.
Ni Mayor Josh Edward S. Cobangbang ti nanggetteng iti ribbon a kaduana ni Brgy. Captain Ruben Siruno iti Barangay Sisim ken inimatangan dagiti mangisursuro ken Opisiales ti kabangibang a barangay.
Anag ti mensahe ni Mayor Josh Edward a maragsakan ta adda pakakitaan iti pateg ti panagtitinulong dagiti maseknan nga Ahensia ken iti LGU a mangipaay iti agtultuloy ken mainaynayon a pagsayaatan iti pagadalan ti Sisim National High School.
Inggunamgunam ti Alkalde Munisipal kadagiti nagannak, agad-adal ken lumugar a maysa a napateg nga oportunidad ti pannakaisaad ti pagadalan ti haiskul ditoy a deppaar ket maisagutda kadagiti serbisio a nga itden ti Gobierno a tumulong iti pagimbaganda nangruna iti pannakaidur-as ti Edukasion.
Naiballaet dagiti intermission number dagiti agad-adal a nangparagsak iti programa.
Nagyaman ni Brgy. Captain Ruben Siruno iti LGU ken iti DepEd iti nainayon manen a pagimbagan ti pageskuelaan ti Sisim National High School.
Nagatendar met dagiti Opisiales ti Barangay Sisim ken dadduma nga organisasion iti barangay iti nasao a seremonia.
Dagiti mangisursuro iti Sisim National High School ket idauluan ni Mr. Roger Dacanay. # (Web In-Action)
No comments:
Post a Comment