Monday, March 6, 2017

LIBRE A BAKUNA TI ANTI-RABIES, AGTULTULOY

Cabugao, Ilocos Sur – Maitultuloy latta ti Rabies Vaccination of Household Pets  dagiti umili iti Munisipalidad ti Cabugao  babaen iti DA-LGU nga imatonan ni Mr. Robert S. Savella, Municipal Agriculturist. Ti Banner Program nga agtartarabaho ditoy ket idauluan ni Dr. Melvyn G. Castro, DVM, Municipal Livestock Coordinator ket kangrunaan a panananda ket dagiti 33 a barangay idinto ta dagiti adda iti asideg ket mabalinda latta metten  nga idanon iti disso a mapagtulagan a pagbakunaanda.

Ti nasaknap a panagbakuna ket komkomplementaran ti LGU Cabugao  nga idauluan ni Mayor Josh Edward S. Cobangbang
babaen iti programa ti Municipal Livestock Office iti “Animal Care Program”.

Imbatad  ni Dr. Castro a nasamay a wagas ti pannaka-organisar iti sangapulo nga addaan ti taraken a di pay nabakunaan  iti maysa a disso ket ditoy ti turongen da Dr. Castro a pagbakunaan. 

Innayon ni Dr. Castro a maselebraran ti “Rabies Awareness Month” iti bulan ti Marso 2017 ket kunana nga iti biangna ket  inaldaw a maipalpalagip kadagiti umili gapu iti agtultuloy nga aktibidadda nga agbakuna iti libre kadagiti adda tarakenna nga aso.

Malaksid iti mayeskediul a trabaho ni Dr. Castro, isamirana pay a sarungkaran dagiti klientena a mangayab kenkuana nga agagas iti masakit  a dinguen ken iti panagbakuna uray aldaw ti Sabado ken ti Domingo.

Kabayatanna, maibatay iti rekord ti RHU-Cabugao, manmano ti rekord ti agpapaagas iti kinagat ti aso wenno kita ti domesticated animals maigapu iti nasaknap nga anti-rabies vaccination a mangprebentar iti panagranggas dagiti nakakagat nga animals sakbayna.

Dagitoy nga aksion ken inisiatiba ket resulta iti agtultuloy  a programa ti Animal Care  ti Gobierno Munisipal tapno matulongan met ti kasasaad dagiti umili  ken  maprebentaranda   a makapet iti sakit a rabies. # (Web In-Action)

No comments:

Post a Comment