Cabugao, Ilocos Sur – Naangay ti Women’s Forum a paset ti pannakaselebrar ti Women’s Month babaen iti Tema: “We Make Change Work For Women” a no sadino ditoy ket nagatendar dagiti kameng ti Rural Improvement Club (RIC); Barangay Nutrition Scholars (BNS); Barangay Health Workers (BHWs); Parent-Leaders ti 4 Ps a naggapu iti 33 a barangay ti ili a Cabugao, Ilocos Sur iti Marso 31, 2017 iti ECCD Building, Brgy. Rizal, Cabugao, Ilocos Sur.
Naluktan ti seminar babaen iti panangited ni Miss Teresita Maximina “Mimi” S. Sison, GAD Focal Person ken HRM Officer ti LGU-Cabugao iti Welcome Remarks.
Kalpasan iti Acknowledgement of Participants, nangted ti Mensahena ni SBM Vicky S. Serna, Committee Chairman, Women and Family Welfare ti Sangguniang Bayan ti ili.
Trinatar ti Konsehala ti Tema iti nadakamat a panagselebrar ket impeksana ti naan-anay a panangidur-asda iti kasasaad ken pagsayaatan dagiti babbai ken ti pamilia babaen iti tulong ti Gobierno Munisipal nga idauluan ni Mayor Josh Edward S. Cobangbang.
Iti Program Proper, naglektiur ni Mrs. Constancia “Connie” L. Quinola maipapan kadagiti kalintegan ken karbengan dagiti babbai a sinaguday dagiti mainaig nga Akta Republika a linteg a napanday iti Kongreso.
Nangibinglay met ti pammalagip ken adal maipapan iti Health and Wellness Program ni Dr. Mark Lawrence T. Tirao, Municipal Health Doctor iti RHU.
Kangrunaan a panggep ti seminar iti pannakaited ti adal kadagiti kababaihan tapno adda pamalpalatpatanda kadagitoy a nayon ti pagrebbenganda iti panagserbisioda iti sapasap ken iti pamiliada.
Naserraan ti seminar kalpasan ti naan-anay a pannakailektiur iti pakabuklan ti “Federalism” a programa ti DILG. # (Web In-Action)
No comments:
Post a Comment