Cabugao, Ilocos Sur – Ti grupo ti Clean and Green Program ti Munisipio ket as-asikasuenna dagiti Pasilidad ti Munisipio (Parke ken Plaza) tapno naan-anay iti pannakalinis ken pannakapapintasda a mabuya iti aglawlaw.
Maysa a kangrunaan a naikkan ti mentenansia ket iti Cabugao Central Park (CCP) a daydaywen ti umili ken bisita iti aldaw ken sardam ken kangrunaan a disso a pakaangayan/pagpabuyaan dagiti aktibidades iti pito nga aldaw a panagpiesta ti ili iti Abril 21-27, 2017.
Iti sabali a bangir, agtultuloy met a mamantener dagiti pasilidad nga usaren ti sapasap nga aggatang iti NISTC Public Market. Babaen iti panangilungalong ti LGU-Cabugao nga idauluan ni Mayor Josh Edaward S. Cobangbang ket maisayangkat ti repair ti pasdek-NISTC Public Market ken pannakataming ti water system iti Tiendaan tapno naan-anay a maserbian ti publiko kabayatan nga addada a gumatgatang iti Tiendaan.
Kabayatanna, regular met a madalusan iti aglawlaw ti pasdek ti Cabugao Commercial Annex iti sango ti NISTC Public Market kasta metten iti pagperiaan iti lauden ti Food Court ken rinabii ti ipapan panag-peria dagiti umili ken iti pamiliada a pangparagsak iti umadani a panagpiesta ti ili.
Segun ken ni MENRO Edgar S. Balangatan, AT, agak-akem a dadaulo ti grupo a monmonitorenda latta iti Cleanliness and Beautification dagiti Barangays a potensial a papanan pagpasiaran dagiti Balikbayans/Bakasionista iti summer month babaen iti pannakikammayetda kadagiti Opisiales ti barangay kadagitoy a lugar.
Dagitoy nga aksion ken inisiatiba ket paset ti Direktiba ti Municipal Chief Executive ti ili iti agtultuloy a panangpapintas iti aglawlaw iti ili a pagsayaatan ken pakairanudan ti sapasap ken panagsagana para iti panagrugi ti selebrasion ti Semana Santa 2017 ken panagpiesta ti ili ti Cabugao inton Abril 21-27, 2017. # (Web In-Action)
No comments:
Post a Comment