Thursday, March 16, 2017

MANGROVE PLANTING, INRUSAT TI PSA-VIGAN CITY ITI WOMENS MONTH

Cabugao, Ilocos Sur – Naangay itay nabiit ti panagmula iti Mangrove Seedlings iti paset ti Sabang Island, Brgy. Sabang, Cabugao, Ilocos Sur babaen kadagiti Staff ti Philippine Statistics Authority (PSA), Vigan City kas pannakikaysada iti agtultuloy a pannakapaberde iti Coastal Area  ti  Munisipalidad  nga idauluan ni Mayor Josh Edward S. Cobangbang.

Umabot ti 1,000 a mangrove seedlings ti naimula, segun ken ni Mr.  Edgar S. Balangatan, AT, MENRO-Designate ti Munisipio a nangtarabay kadagiti mangrove planters. 

Kabayatanna, tumantan-ayen dagiti naimula a mangrove seedlings iti kallabes a tawen iti shorelines a mabatogan ti nadakamat a barangay a disso ti estratehiko a mabalin a namulaan ti mangrove seedlings.

Daytoy nga aktibidad nga insayangkat ti PSA ket parte iti panagselebrarda iti Womens Month iti bulan ti Marso 2017.

Kabayatanna, regular a maar-aramid ti coastal clean-up nga igaygay-at  dagiti multi-sectoral associations  iti  uneg ti nadakamat a barangay tapno mabisita, madalusan ken masugotan dagitoy a namulaan ti mangrove a parte ti kabaybayan, segun ken ni MENRO Edgar S. Balangatan, AT ti LGU-Cabugao.

Innayonna a masirmata a kalpasan ti lima a tawen, agminarton ti pintek dagiti immuna a naimula a mangrove seedlings  ket iti panagkasamekan ti katangriban iti sumagsaganad a tawen ket masalakniban  dagiti agnanaed iti igid ti baybay iti après ti danum-baybay  no agbagyo ken agresulta iti napintas a pamataudan ti pagbiag dagiti agindeg kadagitoy a barangay ta agbalinto a santuario dagiti ikan ken billit dagiti napadakkel a mangrove trees.

Dagitoy nga aksion ken inisiatiba ket gubuay iti nakammayet a panagtutunos ti amin a sektor a mangpaberde iti katangriban babaen iti panangilungalong ti Gobierno Munisipal nga idauluan ni Mayor Josh Edward ken ti PSA-Vigan City tapno maprobitsar dagiti proyekto ken programa ti nasao  a sanga ti Gobierno Nasional iti pagsayaatan dagiti agindeg iti coastal barangays ti ili.  # (Web In-Action)

No comments:

Post a Comment