Cabugao, Ilocos Sur - Paset ti programa ti Gobierno Munisipal babaen iti panangidaulo ni Mayor Josh Edward S. Cobangbang ken ipatungpal ti Tesoreria-Munisipal iti panangidaulo ni Mrs. Lourdes A. Azcueta, Municipal Treasurer iti pannakaiwayat ti Tax Campaign 2017 (panagbayadan ti amiliar) ti daga kadagiti agnanaed ti barangay ken re-classification ti daga babaen iti Municipal Assessor’s Office nga idauluan ni Mrs. Lilia S. Flores.
Buklen ti mangbukel ti grupo dagitoy nga opisina (Treasury ken Asesoria) iti agyeskediul iti papanda iti barangay babaen ti pannakikoordinarda iti Punong Barangay a no sadino a ditoy ket maimpormaran dagiti saan pay a nakabayad/adda ti pakaseknanna iti amiliarna (Real Estate Tax) a bumarangay a mapan agbayad.
“Mayat daytoy a pamay-anda ta umayda dumanonen dagiti taga-Munisipio. No arigen, adu ti trabaho ken turongen ket no umayda, mapalagipankami ta di la ket ta ma-penalty datao panggep laeng ti amiliar!” Kuna ti kaaduan kadagiti umili maipapan iti Real Estate Tax Payment .
Segun kadagiti mangipatpatungpal ti trabaho, maar-aramid ti tax campaign iti tinawen ken re-classification ti daga iti kada tallo a tawen wenno indibidual a pannakasango. Inggunamgunam pay ti Municipal Treasury a masapul nga adda “willingness to pay” ti amin nga adda sanikuana a daga iti panagbayadda ti pagrebbenganda iti Munisipio kas ituding ti Kodigo Lokal.
Dua a barangay ti kaaduan a saklawen ken maileppas dagiti grupo ti ag-tax campaign iti maysa nga aldaw ken nangrugi idi Marso 7, 2017 ken manamnama a maileppasda amin inton Marso 30, 2017 nga agkair a kinse dias.
Ti Tax Mapping Drive ket paset iti programa ti LGU-Cabugao nga idauluan ni Mayor Josh Edward S. Cobangbang tapno maammuan iti umisu a mangbayad ti pagrebbengan ti agtagikua/mangay-aywan (Amiliar) iti lote wenno daga.
Kanaig daytoy a gannuat ket iti agtultuloy a pannakanayon ti masapulan ti Munisipio a maipaay babaen iti porma ti serbisio nga agsubli met laeng kadagiti umili. # (Web In-Action)
No comments:
Post a Comment