Cabugao, Ilocos Sur – Naangay ti Elementary Day iti Cabugao South Central School babaen iti Tema: “A Salinlahi Festivity: CSCS Takes Pride in Unity” a dinar-ayan dagiti agbasbasa nga ubbing manipud iti Kindergarten agingga iti Grade VI; Mangisursuro; Opisiales ti Pageskuelaan; PTA Officers; Opisiales ti Ili; Nagannak/Guardians; Bisita ken lumugar iti Barangay Bonifacio a nakaangayan ti panagselebrar.
Sakbayna, naaramid ti Parada dagiti agad-adal iti uneg ti Poblasion.
Nagpabuya dagiti Grade Levels manipud iti Kindergarten agingga iti Grade VI iti School Stage iti sango ti Cabugao South CS kadagiti adda pakainaiganna iti kultura nga impresentarda.
Iti nagbaetan ti pabuya ket nabunot dagiti Raffle Ticket a napagasatan kadagiti agkakapateg a premio nga indonar dagiti naayat a Donors nga indauluan da Mayor Josh Edward S. Cobangbang, Jr. ken ni Vice Mayor DJ Savellano agraman dagiti Konsehales ti Ili ken sumagmamano a Pribado nga umili.
Nangipaay ti Mensahe ni Mayor Josh Edward S. Cobangbang sakbay a binunotna ti Tiket a nangabak iti First Prize.
Kimmablaaw ken nagyaman ti Ama ti Ili iti nakapinpintas a naipabuya dagiti ubbing ket impeksana ti ragsakna a nangibaga a sapay koma ta agtultuloy ken maul-ulit dagitoy a napintas a presentasion nga impabuya dagiti amin a Grade Levels. Kinablaawanna met dagiti Mangisursuro nga idauluan ni Mrs. Melvi S. Sajonia, Principal II iti nadakamat a pagadalan.
Natudingan met dagiti Nag-Hurado iti dadduma a pakontes a nangpadaeg iti programa. # (Web In-Action)
No comments:
Post a Comment