Cabugao, Ilocos Sur – Segun ken ni Mr. Nereo S. Daproza, dati a Rice Program Coordinator, adda 220 ektaria a natalon, 360 a bilang ti mannalon ken 25 a barangay ti ili iti nakaimulaan ti 2nd Crop Riceplants (Nobiembre 2016 - Pebrero 2017) a kas iti sumaganad: Turod Patac; Arnap; Carusipan; Cuancabal; Lipit; Sisim; Alina-ay; Aragan; Sagayaden; Pila; Dardarat; Baclig; Daclapan; Namruangan; Cacadiran; Bato; Nagsantaan; Maradodon; Nagsincaoan; Marga-ay; Salapasap; Rizal; Quezon; ken Bonifacio.
Iti pannaki-amad ti Web In-Action idi Pebrero 27, 2017, imbatad ni Mr. Nerio S. Daproza, AT, dati a Municipal Rice Program Coordinator ken nadesignaran ita a baro a Municipal Fisheries Coordinator a manmano nga agmintis ti 2nd Crop ta adda pay laeng ti danum a mausar nga aggapu iti Cabugao River nga usarenda a mangpatan-ay kadagiti mulada agingga iti agtapos ti bulan ti Pebrero a panagapitda kasta metten a katulonganda ti irigasion; dagiti bubon ken ubbog.
Innayonna nga uppat ti kangrunaan a paggapuan ti suplay ti pinagpadanumda a kas iti Fully irrigated canal; Shallow Tube Well (STWs); Spring (ubbog) ken ti Open water.
Innayon ni Mr. Daproza nga 98 % ti pakabuklanen iti naapitan kadagiti natalon ket mapatta-patta nga 5 agingga iti 6 a Tonelada kada ektaria pay laeng iti maapit a manamnama a mangnayon iti 1,284 metrika-tonelada a produksion iti naapit itay kallabes a Wet Season 2016 (Hunio-Nobiembre).
Impasingked ni Mr. Daproza a matun-oyan pay laeng iti rice self-sufficiency status ti Munisipalidad iti benneg ti pagtaraon. # (Web In-Action)
No comments:
Post a Comment