Wednesday, March 29, 2017

KATULONGAN A DOKTOR ITI RHU BABAEN ITI PROGRAMA TI DOH

Cabugao, Ilocos Sur  – Iti pannakiuman ti Web In-Action,  kinuna dagiti RHU Personnel a nanayonan manen ti maysa a Doktor iti RHU-Cabugao nga isu daytoy ni Dr. Czarina Pelayo,  babaen iti  Universal Health Care Implementers Project  (UHCIP) ti Department of Health (DOH)  ken katulongan ni Dr. Mark-Lawrence Tirao.
Agtultuloy ti  ipapan dagiti umili iti RHU ket madagdagus iti pannakaasikasoda ken madadaan a maited dagiti agas a kasapulanda babaen iti agtultuloy a panangsuporta ti Gobierno Munisipal  nga idauluan ni Mayor Josh Edward S. Cobangbang kadagiti health programs ti Munisipio tapno agtultuloy a masalakniban  ti salun-at dagiti umili. 

Dagiti nainayon a nagapuanan ti serbisio ti salun-at iti kallabes:

1. Maar-aramid ti Glucose Testing (Blood Sugar Count) iti kada aldaw ti Miyerkules iti lawas ket mabenepisiaran dagiti umili itoy a libre a panagparukod ti asukar ti dara. 

2. Maiyun-una a mataming  dagiti Senior Citizens; People With Disabilities (PWDs); ken masikog nga inna iti pannakataming ken pannakaited ti kasapulanda nga agas.

3. Pannakailunsad ti panagbakuna kadagiti ubbing iti pagadalan-elementaria  babaen kadagiti RN-Heals Nurses. Daytoy a bakuna ket pangprebentar iti nakaro a tumaud a sakit iti agdama ken kontra-kanser.

4. Maitultuloy ti eskediul iti panag-duty dagiti RHU Personnel iti aldaw ti Sabado ken Domingo a pakaragsakan dagiti umili ta adda latta madadaan a mangtaming kadakuada no adda pakaseknanda iti salun-at.

Dagitoy nga aksion ket mainayon a pagdur-asan iti serbisio ti salun-at a kangrunaan a programa ti Gobierno Munisipal nga idauluan ni Mayor Josh Edward S. Cobangbang tapno agtalinaed a nasalun-at dagiti umili a mangnanam iti agtultuloy a panagprogreso ti ili.  # (Web In-Action)

No comments:

Post a Comment