HANDS-ON TI OPERASION TI FLATBED DRYER, NAARAMID ITI BACALL MPA

Cabugao, Ilocos Sur – Naaramid ti Hands-On ti panagoperar ti Flatbed Dryer ket aktual a naidemonstrar iti Flatbed Dryer ti BACALL Multi-purpose Association nga idauluan ni Mr. Dominador Reynold Sabio iti Brgy. Baclig, Cabugao, Ilocos Sur.

Kalpasan a maiyadal  ti Teoria iti naangay a Training idiay Ponce del Mar Resort,  Brgy. Pug-os, Cabugao, Ilocos Sur idi Pebrero 12, 2013, immallatiw dagiti nagpartisipar iti Training iti Sitio Lusong Suyo, Brgy. Baclig, Cabugao, Ilocos Sur a disso ti Flatbed Dryer, Palay Shed ken Multi-purpose Drying Pavement ti BACALL MPA.

Indemonstrar ni Engr. Joseph  Sison ti panangoperar ti Moisture Content Tester kadagiti agtagikua ti Flatbed Dryer nga asosasion nga umabot ti 12 a Farmer’s Associations iti 9 nga ili ti Ilocos Sur.
Naaramid ti Step-by-step a panangoperar ti Flatbed Dryer babaen kadagiti Operators iti PhilMech ken DA-RFU 1-RAEG kadagiti Opisiales ken kameng ti BACALL MPA ken kakaduada a nagsanay.

Iti pannaki-amad ti Web In-Action iti Pebrero 13, 2013, imbatad ni Mr. Julius Bragado ti OPAG-Ilocos Sur  a naregget dagiti nagsanay a nangammo iti ar-aramidenda maipapan iti Operation and Maintenance ken iti Performance Evaluation and Testing ti Flatbed Dryer.

Iti nasao a Hands-On, nagatendar dagiti pannakabagi ti DA-LGU Cabugao babaen ti panangyuna ni Mr. Nerio S. Daproza, AT. Nakidanggay latta met da Engr. Josephine Cabanban, Chief, RAEG; Mr. Jorge Acance, Technical Staff, OPAG, Ilocos Sur ken Mr. Gagni, Focal Person Designate, AgriMechanization and Postharvest Facilities.

Pinagyamanan  ni BACALL MPA President D. Reynold Sabio ti pannakapili ti asosasionda a pakaaramidan  ti actual demonstration ti operasion ti  Flatbed Dryer kas parte ti panagsanay nga ingannuat  ti DA-RFU 1 ken pannakikammayet ti LGU-Cabugao iti panangidaulo ni Mayor Edgardo “Ediboy” S. Cobangbang, Jr. iti agtultuloy a panangtarabayda kadagiti asosasion ti mannalon iti Munisipalidad. # (Web In-Action)