Cabugao, Ilocos Sur – Nagmiting dagiti Barangay Nutrition Scholars (BNS) itay nabiit tapno iringpasdada ti reportda kadagiti aktibidadesda kadagiti barangayda nangruna dagiti binulan a reportda pakaseknan iti trabahoda ken iti naaramid a 5-Day Seminarda iti Munisipio itay kallabes.
Maysa kadagiti kangrunaan a trinatarda ket iti umisu a panangtaraon kadagiti maladaga ken ubbing a kangrunaan nga inadalda iti lima nga aldaw a panagseminar dagiti Barangay Nutrition Scholars (BNS), Barangay Health Workers (BHW’s), Kagawad, Committee Chair on Nutrition ti 33 a barangay ken dagiti 4 P’s Leaders a naangay idi Agosto 18-22, 2014 iti 2nd Floor, Municipal Building, Cabugao, Ilocos Sur.
Kangrunaan a nayadal kadagiti nadakamat a pannakaramay ti Munisipio iti Nutrision ket iti Plan of Action for Nutrition 2011-2016 ken National Plan iti Infant and Young Child Feeding (IYCF) 2011-2016. Naipasagepsep pay ti kaipapanan ti Pabasa sa Nutrisyon, Panagpasuso ti ubing a maladaga, Community Support for IYCF (Infant and Young Child Feeding) ken ti IYCF Counselling Cards.
Naestudiar pay dagiti Re-entry Plan/Presentation of Re-entry Plan ken Post-test and Training Evaluation a mangpasayaat pay ti serbisio ti Nutrision iti ili.
Nagatendar idi kadayta a seminar da Ms. Eileen B. Blanco, Nutrition Program Coordinator, National Nutrition Council (NNC) - Region 1 ken ni Ms. Estella Shane J. Quinto, PNAO-Ilocos Sur. Naglektiur met da Kagawad Macrina I. Saturno, Consistent Awardee in Nutrition, Mrs. Gloria T. Segui, Federation President; Mrs. Agnes S. Ramos, BNS Carusipan ken ni Ms. Bernadette Mauricio, Nutrition Coordinator ti Ilocos Sur .
Segun pay ken ni Mrs. Joenah G. Sevilleja, Municipal Nutrition Action Officer ket maar-aramid latta iti inaldaw a pannakaipakat dagiti wagas a pangpasayaat ti programa ti Nutrition kadagiti barangay maigapu iti aktibidad dagiti Barangay Nutrition Scholars (BNS), maseknan a Komite ti Konseho ti Barangay ken ka-koordinarda pay dagiti kameng ti Barangay Health Workers (BHW’s), Community Health Team (Kalusugan Pangkalahatan) ti LGU-DOH.
Inulitna nga imbaga nga iti naan-anay a pannakaipatungpal ti Breast Feeding a programa ti Gobierno kadagiti inna iti barangayda ti idagdagadagda tapno adda met laeng kaipapanan ti panagseminarda ken ma-evaluate daytoy a programa/aktibidad no maipatpatungpal met laeng.
Dagitoy nga aksion ken inisiatiba ket maigapu iti agtultuloy a pannakaibayog ti programa ti Nutrision iti inaldaw a supsuportaran ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno mamantener ti kinasalun-at dagiti umili kangrunaan dagiti babassit nga ubbing a pamuonan iti promog-progreso nga umili. # (Web In-Action)
No comments:
Post a Comment