Cabugao, Ilocos Sur – Inikkan ti Sangguniang Bayan ditoy nga ili iti autoridad ni Mayor Edgardo S. Cobangbang, Jr. a sumrek iti katulagan iti Philippine Fisheries Development Authority (PFDA) para iti pannakaipasdek ti maysa a Fishport sadiay Barangay Salomague.
Segun ken ni Konsehal Benedicto M. Savellano, Chairman, Committee on Agriculture and Fisheries, maipasdek ti Municipal Fishport iti lauden ti pagbasketbolan iti Barangay Salomague ket no kasapulan, maiwayat ti reklamasion nga aglawa iti 2,000 square meters.
Innayon ni Konsehal Savellano a kiniddaw ni Vice Gov. Deogracias Victor B. Savellano ti nasao a proyekto manipud iti Bureau of Fisheries and Aquatic Resources idi pay la 2008 ket ita, addaanen iti pondo para iti pannakaipasdekna.
Naammuan a counterpart ti Lokal a Gobierno ditoy ti pannakaited iti autoridad ken ni Mayor Ediboy Cobangbang a sumrek iti MOA iti PFDA, ken iti pannakaaprobar ti resolusion para iti project acceptability iti nasao a fishport manipud iti Sangguniang Bayan ken iti Barangay Salomague a pakaipasdekan ti nasao a proyekto.
Bimmisita iti Brgy. Salomague itay nabiit dagiti Marine Engineers ken Technical Staff ti PFDA para iti inspeksion ken re-validation ti nasao a proyekto.# (Adapted, TAWIDNEWS)
No comments:
Post a Comment