Cabugao, Ilocos Sur – Manipud iti Enero daytoy a tawen agingga iti Setiembre, adu ti naipadamag a nagsakit a dinguen a baka iti ephemeral disease kadagiti kabangibang nga il-ili ti Ilocos Sur, segun ken ni Dr. Melvin G. Castro, DVM, Municipal Livestock Inspector ditoy nga ili.
Kinuna ni Livestock Inspector Dr. Castro nga adda latta dagiti mairepreport kenkuana a baka nga agsakit iti ephemeral disease wenno trangkaso a maitudtudo nga epekto ti panagbaliw ti klima iti kallabes a bulan ngem dagus a maaksionan uray aldaw ti Sabado ken Domingo isu a nalapdan ti panagkaro/panagwaras daytoy a sakit.
Indagadag ni Dr. Castro ti dagus koma a panangipakaammo dagiti mannalon no agsakit ti tarakenda a baka iti ephemeral disease tapno masigud a maipakatan iti agas ken asikaso.
Maysa a virus ti makagapu iti “bovine ephemeral disease” ket no kinapetna ti animal, makita dagiti simtoma kas iti panagtigerger, panagsakit ti susuop ti baka, panagsisikkilna, ken dina unay panagngatingat.
No saan a masigud a maagasan dagiti baka nga agsakit iti ephemeral disease, bumaba ti produksionna ken agtungpal pay daytoy iti pannakatay ti animal. # (Web In-Action/Tawidnews)
No comments:
Post a Comment