Naangay ti salip ti Draw and Tell ken Singing Contest kadagiti napili nga ubbing iti 32 a Day Care Centers ti ili a Cabugao, Ilocos Sur idi Oktubre 15, 2014 iti Cabugao Cultural and Sports Complex, Brgy. Rizal, Cabugao, Ilocos Sur.
Naawis dagiti Municipal Officials nga idauluan ni Mayor Edgardo “Ediboy” S. Cobangbang, Jr. Iti impaayna a Mensahe, kimmablaaw ken nagyaman ni Mayor Ediboy ta maikkan latta iti panawen ti kakastoy nga aktibidad para kadagiti ub-ubbing a parte metten ti paka-hulmaanda nga agbalin a responsable ken nasaririt nga umili iti masanguanan.
Pinagyamaman pay ti Ama ti Ili iti agtultuloy a naregget a panangtartarabay dagiti Day Care Workers/MSWDO Staff nga idauluan ni MSWD Officer Mrs. Lydia S. Gazmen kadagiti ubbing kasta metten iti akem dagiti nagannak/Guardians a mangiturturong/mangibagnos latta kadagiti annakda a makikaysa kadagiti programa ti Munisipio ken iti agtultuloy a pannakamuli dagiti annakda/aywanda nga agadal ken mangpasayaat iti masakbayanda.
Nagpaay a Facilitators da Mr. Ronie Solar ken ni Mr. Ferico Arcebal, agpada a Day Care Teachers. Nagpaay met a Hurado ti pasalip dagiti Personnel ti MSWDO-LGU Cabugao nga indauluan ni SBM Atty. Bryann Jett S. Pano, Commitee Chair on Social Services.
Nangipaay met ti Mensahe ni MSWD Officer Mrs. Lydia S. Gazmen ket pinaregtana ti amin a Day Care Workers (DCW’s), nagannak ken Guardians a komplementaranda ti agtultuloy nga anus ken kooperasion iti ipapaay ti LGU-Cabugao ken ti Ahensia ti DSWD a panangtarabay ken tulong kadagiti annakda nga agad-adal.
Nakikaysa met iti nadakamat a selebrasion da Vice Mayor DJ Savellano, SBM Dr. Jemaima S. Tan-Yee ken ni SBM Benedicto M. Savellano.
Ti nasao nga aktibidad ket paset ti panangselebrarda ti Chidren’s Congress ita a Tawen 2014 a pakapilian dagiti mapan a makisalip nga ubbing iti Day Care iti benneg ti Probinsial. # (Web In-Action)
No comments:
Post a Comment