AGTULTULOY A TEXT VOTING PARA VIGAN ITI NEW7WONDERS, NAIDAGADAG

VIGAN CITY – Indagadag  ni Vice Gov. Deogracias Victor B. Savellano ti agtultuloy a panagbutos dagiti umili ti Ilocos Sur babaen iti text message para iti pannakaibilang ti Vigan a maysa kadagiti pito a pagsiddaawan a siudad iti sangalubongan.

Inwaragawag ni Bernard Weber, founder ken presidente ti New7Wonders, idi  Oktubre 7 a maysa ti Vigan iti 14 finalists iti New7WondersCities of the World.

Idi Oktubre 7, indauluan ni Vice Gov. Savellano ti simultaneous text voting a nakipartisiparan dagiti amin nga agtuturay iti probinsia, hepe dagiti pagopisinaan, ken dagiti amin nga empleado iti provincial government a nangibutosanda iti Vigan City iti New7WondersCities of the World.

Sakbayna, nangipaulog ni Gov. Ryan Luis V. Singson iti memorandum a panagbutos amin dagiti personnel iti provincial government agraman dagiti agtuturay ken dadaulo dagiti opisina babaen iti text message kas suportada iti kampania ti Vigan.

Kinuna ni Savellano a panangipakita babaen iti text voting ti panagtutunos ken panagmaymaysa dagiti taga-Ilocos Sur a tumulong iti kampania ti Vigan para iti New7WondersCities of the World. # (Adapted, Tawidnews)