Cabugao, Ilocos Sur – Naangay ti Field Day and Graduation ti Season-Long Farmers Field School on Sustainable Rice Production ti 24 a nagadal a mannalon iti Barangay Quezon idi Oktubre 16, 2014 iti Sitio Baliw, Barangay Quezon, Cabugao, Ilocos Sur.
Daytoy a panagadal ket inesponsoran ti Dapartment of Agriculture-RFO 1, OPAG-Ilocos Sur ken iti LGU-Cabugao nga idauluan ni Mayor Edgardo “Ediboy” S. Cobangbang, Jr. ken impatungpal ti DA-LGU a tarawidwidan ni Mr. Nereo Somera Daproza, AT/Municipal Rice Program Coordinator.
Pammasangbay a balikas ti inakem ni Brgy. Captain Nida S. Braceros ti Brgy.Quezon. Pinagyamananna iti DA ken ti LGU kadaytoy a nagun-od dagiti mannalon a kalugaranda. Impeksa ti Kapitana a kankanayon koma a mairamanda kadagiti programa ti Agrikultura iti LGU-Cabugao tapno agprogreso met ti kasasaad dagiti mannalon ditoy a deppaar.
Iti mensahe ni SB Member Benedicto M. Savellano, Committee Chair on Agriculture ken nangirepresentar ken ni Mayor Ediboy, kimmablaaw kadagiti nagturpos, opisiales ken lumugar ti Barangay Quezon. Dinakamatna ti pateg ti panangarakup dagiti mannalon ti agtultuloy a panagbaliw ti Teknolohia iti panagmula ti pagay. Indagadagna pay iti pannakaipakat iti resulta ti Soil Fertility Mapping a maysa a kapatgan iti panagmulaan dagiti mannalon iti Munisipalidad ti Cabugao.
Kalpasan ti intermission number dagiti nagturpos, napusgan ni Ms. Maria Jessica R. Socias, FFS Participant a nangipresentar ti pakabuklan ti datos ti naaramid a panagadal (aktual ken teoria).
Kinompirma ni Ms. Marilou T. Cabalteja, Regional Rice Area Coordinator dagiti nagturpos ket ni met SBM Member Savellano ti nangibagi ken ni Mayor Ediboy a namagsapata kadagiti opisialesda ken iti pannakaakseptarda a naggraduar iti nasao a kurso dagiti 24 a mannalon.
Iti mensahe ni Mr. Constante B. Botacion, Jr., Provincial Agriculturist, pinadayawanna ti ili a Cabugao iti panagballigi ti FFS-Quezon ken iti naited kadakuada a proyekto ti FFS. Innayonna a naaramid daytoy a panagadal tapno mapaadu pay ti apit ta dakkel ti epektona ti Climate Change iti panagbaba ti maapit. Babaen iti eco-friendly a sistema ken wagas ti baro a teknolohia a maipakat, basbassit ti magastos dagiti mannalon ket masulnitan daytoy a pagbabaan ti maapit.
Naaramid pay ti Awarding of Certificates and Recognition of Oustanding Performance kadagiti FFS Participants a kalaingan kadagiti nagturpos.
Nagatendar met da Mr. Robert Savella, Mr. Nathaniel Galamgam, Mrs. Joenah G. Sevilleja, Ms. Katrene Joy Tapuro ken ni Mrs. Ester Aguimbag, agpapada nga Agricultural Technologists ti DA-LGU Cabugao. Kasta pay dagiti nagbuya a lumugar, sangaili ken Opisiales ti Barangay Quezon.
Sinerraan ni Municipal Agriculturist Zenaida S. Andrada ti programa. Nagyaman iti sapasap a nakipagtaming iti panagballigi daytoy a programa ti Munisipio kadagiti mannalon. # (Web In-Action)
No comments:
Post a Comment