Cabugao, Ilocos Sur – Maang-angay latta ti Coastal Clean-Up kadagiti pito a Coastal Barangay ti Cabugao, Ilocos Sur a no sadino a ditoy ket agpartisipar dagiti bumarangay a pakabuklan ti nadumaduma a sektor kas iti 4 P,s, RIC, BNS/BHW’s, nga indauluan da Barangay Officials kadagita a barangay.
Ibagian met ni MENRO Edgar S. Balangatan, AT ti LGU-Cabugao ken dagiti kakaduana iti Clean and Green Program a mapan agmonitor kalpasanna.
Kabayatanna, iti pannakiuman ti Web In-Action ken ni MENRO Balangatan a ti panagdaldalus iti igid ti kabaybayan ket regular a maar-aramid kadagiti pito a Coastal barangays kas iti Brgy. Dardarat, Salomague, Sabang, Daclapan, Namruangan, Salapsap ken Pug-os. Idadauluan dagitoy dagiti opisiales ti barangayda a manguggor kadagiti kalugaranda a mapan agdalus ken agipakni ti balanet nangruna no lepleppas ti bagyo iti igid ti baybay. Daytoy nga obrada ket nairamanen iti inaldaw a pagrebbenganda agsipud ta agnanaedda iti igid ti baybay. Adda eskediul ti tunggal asosasion/sektor nga agdalus ken adda pay dagiti tangtangdananda nga agdalus tapno mamantener ken agtultuloy a nadalus ti kabaybayanda.
Dagitoy nga aksion ken inisiatiba ket resulta ti napintas a pannakaiwardas ti panangpasayaat ti kabaybayan a katulongan iti panagbiag ken pagnanaedan metten ti dadduma nga umili ti Cabugao.
Komkomplementaran latta met ti Munisipio dagitoy a rusuat babaen iti agtultuloy a suporta ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno agballigi ti programa a panangsaluad iti aglawlaw ken iti kabaybayan ti Munisipalidad. # (Web Situational Report)
No comments:
Post a Comment