Cabugao, Ilocos Sur – Naangay ti 2014 Scouting Month Celebration/Launching a nagatendaran ti 26 a pageskuelaan ti ili a Cabugao, Ilocos Sur iti Cabugao DepED District iti Tema: “Peace and Development Through Scouting” iti Cabugao Cultural and Sports Complex, Brgy. Rizal, Cabugao, Ilocos Sur idi Oktubre 5, 2014.
Sakbayna, nasapa a naangay ti BSP Holy Mass iti St. Mark the Evangelist Parish Church sakbay ti Launching Program iti Cabugao Cultural and Sports Complex.
Naaramid ti Re-dedication of the Scouth Oath and Law, Pangako ng Kab Scout, Batas ng Kab Scout, Kab Scout Slogan ken ti BSP Vision and Mission babaen kadagiti Scout, Kawan ken Troop Leader.
Nag-Words of Welcome ni Mrs. Estrellita M. Siruno, Principal II, Cabugao North CS ken OIC District Supervisor ket kinaritna ti amin nga scouts ken scoutsmasters a makikaysa kadaytoy a tinawen a panagselebrar ken pinagyamananna dagiti Opisiales Lokal ti ili gapu ta isuda ti kangrunaan a mangitaktakder ti Scouting Committee a sanggir daytoy nga aktibidades.
Iti mensahe ni Mayor Edgardo “Ediboy” S. Cobangbang, Jr., Honorary Chairman, Municipal Scouting Committee, kimmablaaw ken nagyaman iti naballigi a pannakaselebrar/pannakairubuat manen ti Scouting Month ditoy Cabugao. Innayon ti Ama ti Ili a dagitoy nga aktibidad ket paset a pakahulmaan dagiti ubbing iti panagbalinda a responsable a lider ken makipagili. Binigbigna ti pateg ti agtultuloy a pannakikaysa dagiti nagannak ken Guardian iti pannakatarabay met dagiti annakda a makipaset iti daytoy a programa kasta met kadagiti mangisursuro a naanus a mangiturturong kadagiti maaramid nga aktibidad.
Innayon ni Mayor Ediboy nga ikagumaanan ti LGU a mangipaay kadagiti nagduduma nga “interventions” para kadaytoy nga aktibidad ti eskuela tapno maikkan met ti mainayon a pagsayaatan dagiti Scouts ken mangisursuro.
Kalpasan a maiballaet ti Yell and Song Presentation iti uppat (4) a Zones, nagsaruno met a nangted ti mensahena da Vice Mayor Deogracias Jose Victorino H. Savellano; SB Member Dr. Jemaima S. Tan-Yee, Committee Chair on Education; ken ni Dr. Gil P. Savellano, Ed.,D., Ilocos Sur Council Scout Executive (OIC).
Kangrunaan a bugas ti mensaheda iti maipapan iti Tema ti Scouting Month a nayon a mangtubay ti disiplina ken sirib kadagiti ubbing ken pakaidaydayawan met ti ili a Cabugao ta aktibo ken adu ti Scouts a makigamgamulo.
Naipadamag pay a maangay ti BSP District Camporal 2014 iti mayeskediul a petsa idiay Barangay Salapasap, Cabugao, Ilocos Sur.
Inakem met ni IR Mr. Carlito Anor, HT, Aragan ES ti Scout Benediction.
Pinagyamanan ti Cabugao DepED District ti naurnos, nabunga ken naballigi a panagselebrar dagiti Taga-Cabugao iti 2014 Scouting Month. # (Web In-Action)
No comments:
Post a Comment