Cabugao, Ilocos Sur – Segun ken ni Mr. Warren Sumibcay, ALS Mobile Teacher, Cabugao South Central School, Brgy. Bonifacio, Cabugao, Ilocos Sur, adda 87 nga estudiante a nagenrol iti Alternative Learning System (ALS) iti nasao a pagadalan a napasnek nga agbasa ken determinado a makaruar iti School Year 2015 - 2016.
Innayon ni Mr. Sumibcay nga ita nga Setiembre 18, 2015 ti nakaeskediul koma a pormal a panaggraduar dagiti ALS Passers iti CY 2013-2014 idiay Baluarte, Vigan City ngem saan a matuloy ngem ketdi ket maiyeskediul inton umay a lawas.
108 ti dagup dagiti bilang ti agbasbasa iti ALS a pakairamanan dagiti re-enrolees a saan a nakapasa iti eksamen a naaramid iti napalabas a tawen ken kabarbaro nga agbasa iti ALS a naggapu iti nadumaduma a barangay iti ili ti Cabugao, Ilocos Sur.
Innem nga oras ti panagbasada iti makalawas ken ileppasda ti panagadalda iti 10 a bulan, segun pay iti ALS Mobile Teacher.
Iti agdama, madama a maisubmiter dagiti kangrunaan a papeles a pakaseknan iti kabibiag ti agbasbasa nga ALS a kasapulan iti panakakualipikarda nga ageksamen iti bulan ti Oktubre 2015.
Mangnamnama ni Mr. Sumibcay a babaen iti agtultuloy a suporta ti Gobierno Munisipal kadagiti programa ti DepED ket maidur-as daytoy a sistema ti edukasion iti Cabugao, Ilocos Sur. # (Web In-Action)
No comments:
Post a Comment