Cabugao, Ilocos Sur – Nailunsad ti “Bakuna para sa Kabataan, Proteksiyon sa Kinabukasan”, libre nga immunization program babaen iti panagkammayet ti DOH, DepED ken iti LGU’s a maited kadagiti Grade 1 iti Elementaria (Public) ken Grade 7 iti amin a Public High Schools iti intero a pageskuelaan ti Munisipalidad.
Ditoy ili a Cabugao, narugian ti ipapan panagbakuna dagiti Medical Personnel iti Cabugao Rural Health Unit (RHU)-Municipal Health Office (MHO) a buklen dagiti Nurses ti RN-Heals ken RHU Medical Personnel idi Agosto 27, 2015 ket agtultuloy a papananda dagiti dadduma a pagadalan a naka-eskediul.
Maibatay iti nagapuananen ti RHU-Cabugao, naserbisyuanda aminen dagiti Public High Schools iti ili a kas iti Cabugao National High School, Pug-os NHS, Sisim NHS ken Lipit ti NHS ken sangapulo ket maysa (11) a pagadalan-elementaria kas iti Cabugao North & South Central School ken dagiti pageskuelaan iti Brgy. Nagsincaoan, Arnap, Carusipan , Daclapan, Cuantacla, Sisim, Salapasap, Bungro ken Sabang.
Makikaykaysa da SBM Atty. Bryan Jett S. Pano, Committee Chairman on Health ken ni SBM Benedicto M. Savellano, Vice Chairman, Committee on Education iti Sangguniang Bayan kadagiti maisaysayangkat nga eskediul ti immunization activities kadagiti pagadalan ti ili.
Segun iti DOH, daytoy nga School-Based Immunization Program ket maibakuna ti Tetanus-Diptheria (TD) ken ti Rubella Vaccine (para kamuras). Dagitoy a medisina ket mangipaay iti tungpal-biag a proteksion kontra iti tetanus ken diptheria ken mangibaba ti insidente ti nakaro a sakit ken mairaman metten iti pannakaparmek ti kamuras (rubella). Daytoy a bakuna ket inaprobaran ti World Health Organization (WHO) ket pinasingkedan ti DOH a natalged, epektibo ken maus-usar iti sangalubongan dagitoy a pagagas. # (Web In-Action)
No comments:
Post a Comment