Cabugao, Ilocos Sur – Naselebraran ti maika- 122 nga Anibersario ti panagkasangay (Setiembre 16, 1893) ni General Eustaquio S. Baclig, Maingel a Soldado iti World War II, a daytoy ti nakaigapuan ti nakaipanaganan ti Barangay Baclig, maysa kadagiti uppat a Barangay ti Cabugao Poblasion, babaen iti Akta Republika 3590 a pinirmaan daydi Dios-ti-Aluadna a Presidente Carlos P. Garcia ti Pilipinas.
Babaen iti panagsukisok iti biagna, ni General Baclig ket nagadal iti US Military Academy, West Point ken nagturpos ti Engineering Degree idi 1917. Inted ni Presidente Manuel L. Quezon ti Purple Cross, kangatuan a Pammadayaw iti Soldado ken Posthomous Promotion to Full Star General gapu iti Tured ken Kinabannuarna.
Iti Setiembre 16, 2015, indauluan ni Brgy. Captain Carlos Vallejo Sison dagiti lumugar ken Opisiales ti Barangay a binayabay da SBM Danilo Q. Gazmen ken ni SBM Josefina S. Vallejo iti pannakaidaton ti sabsabong a pammadayaw iti Monumento ti Bannuar nga Ilokano iti dayaen ti Pasdek ti Munisipio ti ili a Cabugao.
Nakulminar pay ti selebrasion babaen iti naaramid a Nasantuan a Misa iti Barangay Hall, Barangay Baclig nga inatendaran dagiti Opisiales ti Barangay, kameng ti Pamilia ken Kabagian ti Heneral ken dadduma pay nga Asosasion/Sektor a masakupan iti nasao a barangay.
Kalpasan ti Misa, pinagyamanan ni Brgy. Captain Sison iti partisipasion dagiti kabarangayanna, Opisiales ti ili a nagatendar ken dagiti kameng ti Pamilia ni General Eustaquio S. Baclig. Imbasa pay ti Kapitan iti Resolusion ti Konseho iti Barangay Baclig nga agkidkiddaw iti espasio a pakabangonan ti Monumento ni General Baclig a daytoy ket masarakan iti disso ti lote iti kadarapat ti nagdissuan ti Barangay Hall.
Ti Barangay Baclig ket daytoy ti kadakkelan ti Land Area kadagiti barangay iti Poblacion (227.5 Hectares). Panagtalon ti kangrunaan a pagbiagan dagiti agindeg ditoy a Barangay. Addaan ti dua a Sitios: Lusong Suyo ken ti Callaguip. # (Web In-Action)
No comments:
Post a Comment