Cabugao, Ilocos Sur – Nagmimiting dagiti mangisursuro iti Cabugao South Central School nga idauluan ni Mrs. Melvi S. Sajonia, Principal II idi Setiembre 10, 2015 iti pageskuelaan ta rugianda nga ipatungpal ti programa ti Departamento ti Edukasion (DepED) maipapan iti panangtulongda kadagiti ubbing nga Undernourished (manipud Kindergarten agingga iti Grade VI) tapno maipasnekda ti agadal no naan-anay ti sustansia a taraonda iti inaldaw.
Segun ken ni Mrs. Annabel Ancheta, School Canteen Coordinator nga iti nadakamat a programa ditoy a pagadalan ket adda umanay a bilang ti ubbing a maikkan ti libre a pangaldaw kadaytoy a panangipatungpalda ti programa ti Feeding a manamnama a marugian inton Setiembre 14, 2015.
Kanaig daytoy, pinaregta ni Mrs. Sajonia dagiti amin a nagannak iti pagadalanda iti panag-gardenda iti pagadalan kasta metten kadagiti balbalayda tapno agmulada ti nadumaduma a natnateng a pangnayon pay iti pagtaraon dagiti ubbing ken ti pamiliada.
Kabayatanna, maang-angay ti Regular Group Works ti Federated Homeroom PTA ti pagadalan ken General Cleaning iti uneg ken ruar ti pagadalan tapno matulongan dagiti ubbing nga aglinis kasta metten kadagiti mangisursuro a mangmantener iti kinadalus/sanitasion ti pageskuelaan. # (Web Situational Report)
No comments:
Post a Comment