Cabugao, Ilocos Sur –Naileppasen ti panag-census dagiti 34 nga Enumerators (ag-census) ti ili a Cabugao, Ilocos Sur a nasanay sakbayna iti Municipal Conference Building ditoy nga ili idi Agosto 3 agingga iti Agosto 8, 2015 babaen iti panangigannuat ti Philippine Statistics Authority (PSA).
Kalpasan ti nasao a panagsanay, naideploy dagiti Trainees nangrugi idi Agosto 10 agingga iti Setiembre 6, 2015 babaen iti panangtarabay ti PSA-Vigan City ken ti LGU-Cabugao.
Imbatad ni Mr. Melchor Saliganan Bautista, Supervisor nga awan ti nakaro a timmaud a problema ket naannayas ti pannakaipatungpal ti panagalada ti datos dagiti Pamilia ditoy Cabugao.
Innayon pay ni Mr. Bautista a maigangannuat daytoy a nationwide census iti kada 5 a Tawen ti mapalabas. Naaramid manen daytoy idi Tawen 2010 ket masunotan ita a Tawen 2015.
Iti naaramid a population census, tinarabay ni Mr. Bautista dagiti Enumerators iti ili a Sinait, Cabugao ken San Juan, Ilocos Sur manipud idi Agosto 10 a panagrugida agingga iti Setiembre 8, 2015 a pannakalpasna. Ar-aramiden itan ti PSA Staff ti Editing and Verification sa Manual Editing and Encoding dagiti resulta iti panag-censusda. # (Web In-Action)
No comments:
Post a Comment