SOLID WASTE KEN CLEAN AND GREEN, AGKUYKUYOG A PROGRAMA TI LGU

Cabugao, Ilocos Sur – Iti pannaki-amad ti Web In-Action iti Setiembre 28, 2015,  imbatad ni Mr. Edgar  S. Balangatan, AT, Municipal Clean and Green Program Coordinator iti   agtultuloy  a panaglinisda kadagiti pampubliko a pasilidad ti LGU-Cabugao babaen iti programa ti Clean and Green ti Munisipio.

Iti Coastal barangay ket regular met a maiwayat iti panagdalus nga idauluan  dagiti Opisiales ti Barangay iti parte a masakupanda babaen iti itutulong dagiti sektor ken asosasion iti barangayda.

Kabayatanna, maar-aramid latta  ti regular a panaglinis iti agsumbangir ti Kalsada Nasional manipud Barangay Sagayaden agingga iti Barangay Pug-os babaen iti panagtinnulong dagiti LGU Personnel ti Clean and Green ken Maintenance Section ti DPWH-Bantay, Ilocos Sur.

Nupay kasta, insupusop ni MENRO Balangatan a saan latta met nga agsina a pakaseknan ti Munisipio iti maipapan iti Solid Waste Management ken iti Clean and Green iti intero a Munisipalidad.

Kasta met nga agtultuloy a maipromot koma iti panagdaldalus iti kalsada kadagiti barangay babaen iti itutulong dagiti Opisiales ti Barangay a kabinnulig ti Munisipio a mangitandudo kadagitoy nga agdama a programa, segun pay ken ni MENRO Balangatan. )

Kabayatanna,  malaksid iti impraestruktura a proyekto a  maiwaywayat iti Kalsada Nasional a masakupan iti   Sitio Cabaruan, Brgy. Cuancabal, napintas ti panagkinnoordinar ti DPWH District 1,  Bantay Office, Ilocos Sur ken iti Clean and Green Program ti LGU-Cabugao iti regular a pannakamantener ti kinadalus ti National Highway iti mabatogan ti Munisipalidad manipud iti Brgy. Sagayaden agingga iti Brgy. Pug-os.

Irugi met ti DPWH Maintenance Section iti Brgy. Pug-os (Bimmeclat Bridge) ket makisinnabatda nga agdalus iti agsumbangir ti kalsada agraman dagiti rangtay a masakupan iti Kalsada Nasional.

Innayon ti MENRO a linawas a wanasenda ti stretch ti Sagayaden-Pug-os a pidutan ti selopin ken dadduma pay a ruot iti kalsada ken monitorenda met ti panagdakkel ti ruot ket apaman a mabalindan a dalusan ket ditoyen nga ag-grass cutter-da.

Daytoy a koordinasionda iti DPWH ket agtultuloy a mangpasayaat ti buya ti Kalsada Nasional a mayataday pay  iti agtultuloy a pannakaipromot ti Turismo iti ili.  # (Web Situational Report)