Cabugao, Ilocos Sur –Maibatay iti panagsarita dagiti Opisiales ti Cabugao Livestock and Traders Association nga idauluan ni Mr. Marciano Raciles, Jr. ket mayat ti transaksion a mapaspasamak iti panaggiginnatang dagiti koridor ken dumadayo iti Cabugao Dayo kadagiti bulan ti Tawen 2015.
Innayonda a kaaduan nga animales a maparti iti Tiendaan (NISTC Public Market) kas iti nuang ken baka ket maaramid ti transaksion iti uneg ti Dayo. No adda man aggapu iti ruar a maparti ket saanda nga ipalubos a maaramid daytoy ta maisalungasing iti napagtutulagan ti Asosasion ta maiserrek nga umuna iti Kaha ti Dayo ti pagbayad ti tunggal transaksion iti panagginnatang.
Kas iti sigud, nabun-as dagiti nuang ken baka a mai-dayo ket kaaduan ti nagatang a para-parti babaen kadagiti kameng ti Cabugao Meat Vendors/Butcher’s Association iti NISTC- Public Market, Cabugao, Ilocos Sur.
Kalpasan ti panagmiting dagiti kameng ti livestock association itay nabiit, napatibker manen ti panagkakaduada nangruna iti pannakausar dagiti puonan iti panaggatang nga agtultuloy a mangingato ti masapulan ti asosasion ken pakabenepisiaran met dagiti kameng iti agdama. Daytoy nga asosasion ket agtultuloy a tartarabayen ti LGU-Cabugao a mangipromot ken mangkomplementar kadagiti programa/proyekto para iti pagsayaatan dagiti agtartaraken iti dinguen ken ayup a mainayon a pagsapulanda iti benneg ti industria ti livestock. # (Web In-Action)
No comments:
Post a Comment