Cabugao, Ilocos Sur – Nabendisionan ti baro a Traktora (Kubota) a maited iti Cabugao Vegetable Growers Association ita a Marso 9, 2012 babaen ti panangannong ni Rev. Fr. Felicisimo “Rudy” Ferrer, Kura Paroko ti ili a no sadino a ditoy ket inimatangan ti pamilia-LGU nga idauluan ni Mayor Edgardo “Ediboy” S. Cobangbang, Jr., opisiales ti Barangay ken asosasion ti mannalon ken kameng ti media iti sango ti Munisipio.
Iti naiwayat nga interbiu, impeksa ni Mr. Eleuterio S. Piros, Presidente ti Cabugao Vegetable Growers Association iti panagyamanna iti Gobierno Munisipal nga idauluan ni Mayor Ediboy iti pannakabigbig ti kasapulanda nga agmulmula ti nateng ti ili ti Cabugao kasta met iti DA-LGU ken DA-RFU 1 a nakipaset ti 50-50 Equity Scheme tapno mapaadda daytoy a baro a traktora.
Impeksa met ni Mayor Ediboy ti panagyamanna kada Gov. Luis “Chavit” Singson ken Vice Gov. DV Savellano gapu iti pateg ken akem ti pundo ti R.A. 7171 a naggapuan ti 50% a counterpart ti LGU tapno masupusopan ti 50% a binagi met ti Department of Agriculture-Regional Field Unit 01 iti pannakagatang ti baro a traktora. Innayon ti Alkalde a batang met ita dagiti asosasion ti agmulmula ti nateng iti maikkan iti tulong ta maapresiar met ti regtada a mangitandudo ti programa ti agrikultura ken tapno maidur-asda pay ti agpatanor kadagiti high value commercial crops.
Iti pannakabendision ti baro a traktora, nakitaripnong met da ABC President, Brgy. Captain Teddy U. Soller, Mrs. Zenaida S. Andrada, Municipal Agriculturist, MPDC Florante Jara, ken MAFC Chairman Rogelio Barlolong. # (Web In-Action)
No comments:
Post a Comment