CABUGAO, ILOCOS SUR – KELLAAT a nag-Ocular Surprise Inspection ti Department of Trade and Industry (DTI)-Vigan City iti Northern Ilocos Sur Trade Center (NISTC) itoy nga ili. Pininda da DTI-Vigan City Officers Pedro S. Romano, Jr., Annabel G. Pulanco, Rogelio R. Ragasa, ken Agriculturist II Jojo Acance dagiti timbangan (weighing scale) iti wet market, grocery stores, meat section, ken dagiti pay agtagtagilako nga awan stall-da. Panggep ti DTI a nasken nga usto ti timbangan, kalidad, timbang (net weight) dagiti tagilako iti NISTC.
Dagiti agtagtagilako nga addaan pagtimbangan a daan balakadan ti DTI a gumatangda iti baro a timbangan ken no biddut ti timbangan masapul a ma-calibrate a dagus tapno usto ti timbangenna. Ingunamgunam pay ti DTI-Vigan City ti panagusar dagiti agtagtagilako iti “Price Tag Law”.
Binayabay itoy a kampania ni Cabugao Market Supervisor Manuel Gorospe. Kasta met a nakitinnulong ni NISTC Task Force Darwin Sumibcay ken dagiti kakaduada ken sumagmamano a polis itoy nasaknap a kampania iti usto a pannakatimbang dagiti tagilako.
Adda met “Price List” iti Green Board a naipaskil iti abagatanen a puesto dagiti aglaklako iti ikan. Awan ngaruden ti rason dagiti agtagtagilako a mangusar a naan-anay kadagiti timbanganda tapno usto ti timbangenna. (joe s. somera) A#
No comments:
Post a Comment