Bayan ng Cabugao: KAPPESSA A PAWIKAN, NASARAKAN ITI BRGY. NAMRUANGAN

Monday, March 5, 2012

KAPPESSA A PAWIKAN, NASARAKAN ITI BRGY. NAMRUANGAN

Cabugao, Ilocos Sur – Nasarakan ti maysa a lumugar ti Barangay Namruangan ti kapespessa a nabiag (marine turtle) iti aplaya ti Barangay Namruangan idi Marso 2, 2012 a no sadino a ditoy ket nagaarakan ti bumarangay ken kameng ti media ti napan nangkita kadaytoy a naisangayan a damag ti baybay.

Segun iti nakakita, namalamalan ti timmangken a darat dagitoy a nabiag a babassit a pag-ong ti langada ket pattapattana ket agsangagasutda ngem 49 laeng ti bilang ti naitakdangna ta natayen dagiti dadduma.

Apaman a naipanda iti plastik a batia, naipakaammo ken ni Brgy. Captain Robertson “Bongbong” Gorospe ket dinagdagus met ni Kapitan Gorospe a napan iti Munisipio a nangipagteng ti damag ditoy.
Nagresponde ti DA-LGU nga indauluan da Municipal Agriculturist Zenaida S. Andrada ken Municipal Fishery Coordinator Milagros R. Paz ket nagturongda iti ayan dagiti kappessa a pawikan (hatchlings marine turtle).

Segun ken ni Mr. Antonio Patol, pannakabagi ti Protected Marine and Wildlife Section ti DENR, idi laeng rabii ti Marso 1, 2012 ti pannakapessa dagitoy. Nupay kasta, manmano ti agbiag kadagitoy ket sadanto la agitlog/aganak inton madanonda ti 30-50 anyos ket sublianda a pagitlogan ti naggapuanda, innayon ti DENR Official.

Kalpasan a naimpormaran ti pannakabagi ti DENR dagiti opisiales ti barangay, napagkaykaysaan nga idauluan da Kapitan Gorospe ken Fisherry Coordinator Paz ti mangibulos dagitoy a nabiag iti baybay iti alas sais ti oras ti malem agsipud ta marigatan dagitoy a nabiag ti “pressure” no kapudot ti tiempo ken danum ti baybay.

Kadua ni Mrs. Milagros R. Paz da SB Member Jemaima Tan-Yee, Chairman, Committee on Ecology and Environmental Management ken Brgy. Captain Robertson “Bongbong” Gorospe ti Barangay ti grupo a nangibulos kadagitoy a hatchlings iti baybay ti Brgy. Namruangan iti sakbay a lumnek ti init iti dayta nga aldaw. # (Web In-Action)