Cabugao, Ilocos Sur – Nailunsad ti pasalip ti Birit Quest idi rabii ti Marso 3, 2012 a maysa kadagiti makapagagar nga aktibidad iti mapaspasungadan a panagpiesta ti ili ti Cabugao iti bulan ti Abril 2012 a no sadino a ditoy ket inarak dagiti umili ken sangsangaili a nangkuyog kadagiti contestants a naggapu iti nadumaduma nga ili ti Ilocos Sur.
Baro a rupa ti dua a hosts a kadua ni Mr. Allen “Pambayan Kabayo” Ubaldo, a da Miss Elena Arrogante ken Mr. John Mark Garcia a nangnayon ti atraksion ti pakontes iti stage ti Cabugao Central Park (CCP), Brgy. Bonifacio, Cabugao, Ilocos Sur.
Kalpasan ti pannakaidaton ti Ababa a Kararag ken pannakakanta ti National Anthem, kimmablaaw ken nagyaman ni Mayor Edgardo “Ediboy” S. Cobangbang, Jr. kadagiti adu nga umili ken bisita a naitallaong iti Central Park. Naragsakan ti Alkalde gapu ta kankanayon nga adu ti umili nga agbuya/mangsegga ti panangsarabo ken panangrambak ti panagpiesta ti ili.
Sangapulo (10) a Semi-Finalist ti nagkanta iti Junior Category idinto ta 15 met iti Senior Category. Maiduma ita ti wagas ti introductory presentation ti agkanta iti stage babaen ti tulong ni Mr. Althone Borja, IT Consultant ti LGU-Cabugao.
Ti Birit Quest ket naorganisar babaen ti panangidaulo ni Mr. Emilio “Bobot” C. Somera, Jr. ti Barangay Bonifacio, Cabugao, Ilocos Sur. Katinnulongna ni Mrs. Dess Soller, kapisi ti puso ni ABC President, Rizal Brgy. Captain Teddy U. Soller a nakitinnarabay met iti pakontes.
Kangrunaan nga esponsor ti LGU babaen ti panangilungalong ni Mayor Ediboy, ABC President Teddy U. Soller, Cabugao Ladies Intensified Group babaen kada Mrs. Jerlie Seguban-Cobangbang ken Mrs. Dess Soller, Mr. Jeremy A. Seguban, Jr. ken dadduma pay a patron ti musika saanen a nainaganan.
Segun ken ni Mr. Bobot Somera, makapasegga ti sumaruno a Sabado ti pakontes agsipud ta ditoy a makerras ti dua a contestant iti Senior Category ken maysa iti Junior Category agingga a saglilimadanto laengen a Finalists nga agsasalisal para iti puesto.
Segun ken ni Mr. Bobot Somera, makapasegga ti sumaruno a Sabado ti pakontes agsipud ta ditoy a makerras ti dua a contestant iti Senior Category ken maysa iti Junior Category agingga a saglilimadanto laengen a Finalists nga agsasalisal para iti puesto.
Makapagagar met dagiti premio a nailatang ti tunggal kategoria (Junior ken Senior): Grand Champion – P20,000; 1st Runner-up- P10,000; 2nd Runner-up- P5,000 ken sag-P3,000 ti dua a Consolation Prizes.
Binusatan dagiti napili a a dua a Promising Singers ita nga umuna a Sabado (Junior ken Senior Category) ti immawat iti sorpresa a gunggona (naisobre a cash). # (Web In-Action)
No comments:
Post a Comment