Cabugao, Ilocos Sur - Ti kina-16 aniosnan a kooperatiba (naipasdek idi 1996) ti mangipalgak nga establisadon ti Free Farmers Multi-purpose Cooperative , Inc. iti Barangay Sagayaden, Cabugao, Ilocos Sur ken agtultuloy ti idadakkel ken panagprogreso ti nasao a kooperatiba babaen ti panangidaulo ni Mr. Zosimo Sayaboc, Manager.
Pammaneknek nga idi 2009, 9 Million ti sanikua ti kooperatiba ket itan ag-11 Milionen ti dagup ti sanikuana, segun ken ni Mrs. Dominica Sayaboc, Bookkeeper. Innayon pay ti Bookkeeper nga innem a Milion ti nakaparuar ita a loans kadagiti klienteda ngem linawas met nga adda agbayad ti parte ti nabulodda.
Segun ken ni Manager Sayaboc, nabiit pay a nakagatangda ti Freigth Truck a mangsuporta kadagiti luganda ken ti kangrunaan unay ket ti pannakaipatakder ti Warehouse-da nga impaay ti Gobierno Munisipal nga idauluan ni Mayor Edgardo “Ediboy” S. Cobangbang, Jr. Immuna a naited ti dagup ti P300,000 manipud iti pundo ti R.A. 7171 ket naibanag ti pannakabangon ti bodega ken simmaruno a naited ti sabali pay a P300,000 manipud met laeng iti R.A. 7171 idi Marso 7, 2012 ket naited ti tseke ken ni Manager Zosimo Sayaboc babaen ken ni Mayor Ediboy.
Imbatad ni Manager Sayaboc a nalawlawa ita ti pagikabilanda ti magatangda a produkto nangruna iti pagay a mapabagas ken pakaibodegaan pay dagiti epektos/inputs a kasapulan dagiti mannalon a serserbisyuanda. Marikna unay ti kooperatiba a kasapulanda ti maysa a warehouse. Impeksa ni Manager Sayaboc iti nalaus a panagyamanda iti LGU nga idauluan ni Mayor Ediboy gapu ta napatgan ti kaligakum iti ag-335 a miembros a pannakabangon ti bodega iti kooperatibada.
Iti maika-15 nga Annual General Assembly Meeting-da idi Pebrero 23, 2012, naistudiar dagiti pagannurotanda ken naamiris ti nagpigsaan ti kooperatibada ket ditoy a nanayonan dagiti plano a mangpapigsa pay ti operasionna. Naipaganetget a saan nga iti kinapardas ti panagdur-as ti gamgamenda no di ket ti in-inut a panagluposda babaen iti “long term” a pagbanagan ti kooperatiba: makatulong/makaserbisio kadagiti mannalon ken makatulong met iti miembrosna, iti komunidad ken ti Gobierno Munisipal babaen ti pannakaited kadagiti pagrebbenganda a kas umili.
 |
| Ti maitultuloy a pannaka-diding ti bodega ti Free Farmers MPCI ti Barangay Sagayaden. |
Kinuna ti Bookkeeper nga iti laeng natulnog a panagbayad ti nabulod a kantidad ti mantenerenda a kangrunaan a pormula tapno matun-oyanda dagitoy a darepdep ti kooperatiba. Maragsakanda met ta makatulong no kaskasano ti kooperatiba iti pannakapaadda ti panggedan dagiti awanan trabaho. Dayta ti gapuna a “sustenable ken pannakapatibker” ti amin nga aspeto ti operasionda ti naynay a pokusanda iti Hunta Direktiba.
Ti Free Farmers MPCI ket nagun-odna ti maikadua a puesto (First Runner-up ti kategoria a nakaisalipanna) iti Laing ti Barangay 2011 ti Munisipalidad ti Cabugao ken nominado iti Semi-Finalists iti Siglat Awards 2011 a nakapadayawanda nga agpadpada iti premio ken sertipiko. (Web In-Action)
No comments:
Post a Comment