SELEBRASION TI 1ST HIGH SCHOOL DAY TI SISIM NHS, NABALLIGI!

Cabugao, Ilocos Sur – Inangay ti Sisim National High School ti 1st High School Day Celebration   idi Marso 10, 2012  iti School Auditorium  a no sadino a ditoy ket naaramid dagiti aktibidades ti aldaw ken naangay ti Coronation Night a nangiturayan da His Royal Highness Kenneth Serdenia 1st ken Her Majesty Queen  Beverly Rogante 1st.

Naidaton ti Nasantuan a Misa iti 8:00 A.M; naisaganad ti  Sisim NHS Got Talent ken Coronation Night iti 7:00 P.M. iti dayta met la nga aldaw.

Linuktan ni Mrs. Rosemelinda D. Baclig, Officer In-Charge ti programa. Pinagyamananna ti agtultuloy  a pannakaited ti kiddawenda a kasapulan ti eskuela manipud kada  Diputado Ryan Luis V. Singson ken ni Mayor Edgardo “Ediboy”  S. Cobangbang, Jr. Inraman met ti OIC ti pateg dagiti opisiales a dakkel ti akemna iti pannakaipasdek ti eskuela ken dadduma pay nga opisiales ti Gobierno Lokal a tumultulong kadagiti dadduma pay a  pakaseknan ti pagadalan.

Naipabuya  ti intermission number ti Teaching Staff ti Sisim NHS.

Nangited ti mensahe ni SB Member Vicky S. Serna, Committee Chair on Education iti Sangguniang Bayan ket inapresiarna ti gaget ken tunos dagiti mangisursuro a nangangay ti kastoy nga aktibidad nupay adda iti  umuna a tukad pay laeng dagiti agad-adal.

Naisaruno ti  March  ken Investiture of the Royal Court. Insaad da Mayor Ediboy ken SB Member Vicky S. Serna ti korona ken Capa  ti Ari; Sash ti inted da Mr. & Mrs. Robert Serdenia,  Lei ken ni Brgy. Capt. & Mrs.  Ruben Siruno ken Tropeo ti inyawat ken indonar  da Vice Mayor & Mrs. Danny Q. Gazmen.

Iti mensahe ni Mayor Ediboy, kimmablaaw ken pinadayawanna dagiti amin a naitallaong: agada-adal, mangisursuro, nagannak, bisita, padana nga opisiales ti LGU, Kapitanes ken ni Nag-Mayor Andrea Soller-Tan a timmaripnong  iti nasao a selebrasion. Dinakamat ken inapresiar ni Mayor Ediboy  ni Pasado a Mayor Dely ti gannuatna a nangirugi ti pannakapaadda ti eskuela ti Sisim NHS.

Imbatad ti Alkalde nga iti adu a nagdur-asan ti pagadalan ket kabuyogna ti panagadu ti umay agbasa iti sumaruno a panagseserrek ti klase. Dinayaw pay ni Mayor Ediboy ti laing dagiti mangisursuro a nangyusuat daytoy nga aktibidad. Impaganetgetna ti panagadal a nasayaat dagiti ubbing.

Naisaad met ti korona ti Reyna babaen ken ni Nag-Mayor Dely Soller-Tan;  Scepter da Mayor Ediboy ken SBM Vicky S. Serna;  Capa da Vice Mayor Danny Q. Gazmen ken SBM Josefina S. Vallejo;  Bouquet ni Mr.  & Mrs. Roger Dacanay; Sash da Mr. Rizaldy Addongay ken Ms. Gina Paguirigan ken Tropeo ti inyawat ken indonar  da Mr. Arbie Siruno ken Ms. Romlyn Baclig.

Ni Mayor Ediboy ken SBM Vicky S. Serna

Ni SBM Carlito Pano ken ni Mrs. Rosemelinda D. Baclig, Officer In-Charge

Ni SK Federated Benazir B. Sarmiento ken Vice Mayor Danilo Gazmen

Nagsarita met ni Nag-Mayor Dely Soller-Tan ket dinayawna ti panangituloy ni Mayor Ediboy ti pannakalukat ti eskuela ken ti nagdur-asanen  dagiti pasilidades daytoy. Mangnamnama met ni Ex-Mayor Dely  a makatulong  daytoy iti edukasion iti dayta a deppaar ket babaen ti tulong dagiti opisiales ti gobierno ket agprogreso pay ti Sisim NHS.

DAGITI DADDUMA A KAMENG TI ROYAL COURT:
1ST Prince – Marvin Jay Pichay
1st Princess –Jamaica Reton
2nd Prince – Arjay Sapinoso
2nd Princess – Lani Jane Sabugo
3rd Prince – John Patrick Mateo
3rd Princess – Angelica Naval
4rth Prince – Warren Sardeng
4rth Princess – Ma. Teresa Manuel

Rinikepan  ni Brgy. Captain Ruben Siruno ti programa. Nagyaman ni Kapitan Ruben  iti napintas a tunos ti amin a nakipaset iti nasao a selebrasion. Nagpaay nga emcee da Mr. Roger Dacanay ken Miss Daisy Jane Somera, agpada a mangisursuro iti Sisim NHS. # (Web In-Action)