Friday, March 16, 2012

CABUGAO DAY CARE MASS RECOGNITION: CLUSTER 1& 2, NAILEPPAS

Cabugao, Ilocos Sur – Naangay  ti Cabugao Day Care Mass Recognition ti Cluster 1 (Alina-ay, Aragan, Cael-layan, Catucdaan, Daclapan, Maradodon, NIST DCC, Pila,  Sisim, ken  Turod Patac) ken Cluster 2 (Baclig, Bato, Dardarat, Nagsantaan, Namruangan, Pug-os, Quezon, Repa-ac, Sagayaden, ken  Turod) idi Marso 15, 2012 iti Cabugao Cultural and Sports Complex, Brgy. Rizal,  Cabugao, Ilocos Sur.

Iti bigat ti Marso 15, immuna a  nagprograma ti Cluster 1. Nag-Words of Welcome ni Jyrus Brydel  Sunio, Alinaay DCC, ket napnuan namnama ti anag ti panagsarita ti ubing.

Panangiyapal iti makitkita ken mabuybuya ken agtultuloy a panangapresiar ken panangtaripato kadagiti ubbing  ti kaipapanan ti mensahe ni Mr. Gilbert Seguritan, Federated President, DCSPG.
Kalpasan ti pannaka-iyaspili ti ribbon dagiti ubbing nga adda honors-na babaen kadagiti nagannak kasta met kadagiti nakagun-od ti Gold Medals kadagiti Most Outstanding Graduates, impaay ni Mayor Edgardo “Ediboy” S. Cobangbang, Jr. ti Inspirational Talk.


Kimmablaaw ken nagyaman ni Mayor Ediboy iti pannakaawisna manen a mangimatang ti panagturpos dagiti ubbing iti Day Care. Dinayawna ti bugas ti mensahe ti ubing a ni Jyrus Brydel ket iti kinaanus a panangmuli dagiti mangisursuro ken nagannak,  ipamatmatna ti napintas a pagbanagan ken  masakbayan dagiti ub-ubbing ken iti masanguananda a kas umili ti  Cabugao. Dinakamatna met ti akem ti MSWDO nga idauluan ni Mrs. Lydia S. Gazmen ken ti Sangguniang Bayan nga idauluan ni Vice Mayor Danny Q. Gazmen a kabinnuligna a mangilungalong kadagiti programa ken proyekto para iti pagsayaatan ti ub-ubbing nga agbasbasa  iti amin a barangay ti Cabugao.

Nagpaay a Guest Speaker ni SB Member Vicky S. Serna, Committee Chair on Education ti Sangguniang Bayan. Pinadayawan ti Konsehala dagiti Day Care Teachers a mangtubay kadagiti ubbing tapno  maisaganada iti nangatngato a tukad ti adal. Innayonna a ti Day Care Center ket “extension”  ti pagtaengan a pakamulian ti natibker a pundasion ti biag ti ub-ubbing.

Simmaruno ti pannaka-award ti Silver Medals kadagiti Outstanding Graduates babaen kadagiti nagidonar nga indibidual ken Gold Medals kadagiti  A-1 Children babaen kadagiti SB Members a naitaripnong.

Kinompirma ni Mrs. Lydia S. Gazmen dagiti nagturpos nga ubbing ken insarunona ti nagmensahe. Pinagyamananna ti amin a nainaig iti natunos a pannakaangay ti Mass Recognition. Kinaritna dagiti agbasbasa nga ubbing nga agsingsingpetda a kanayon  ken ituloyda ti agbasa tapno adda sanggirda iti masakbayan’

Iti malem, naangay met ti recognition program ti Cluster 2. Nagpaay a Guest Speaker ni Dr. Ivy Castro Bello, M.D. Inatendaran met laeng ni Mayor Ediboy ken ni MSWD Officer Lydia S. Gazmen agraman ti Staff-na. Imbinsa ni Dr. Bello ti nainaan a panangpatan-ay ti ubing. Innayonna a ti panangpaadal ti ubing ket mainayon a kasapulan ti panagdakkelda. Kasapulan a mapadayawan ti ubing no agaramid ti naimbag ken maliklikan koma ti panangkonsintir iti madi nga aramidenna tapno nasapsapa a matungday daytoy a galad.

Kalpasan ti Graduation Song, naited dagiti Sertipiko ti Panagturpos ken sinerraan  ni Ms. Renabel Saniatan , Namruangan Day Care Worker ti programa. # (Web In-Action)

 

No comments:

Post a Comment